ყოფილმა პრემიერმა ვანო მერაბიშვილმა სასამართლოს სხდომებს სამომავლოდ ბოიკოტი გამოუცხადა. როგორც 26 მაისის საქმეზე მერაბიშვილმა დაკითხვისას განაცხადა, იგი მომავალში სასამართლოში აღარ მივა.
მისი თქმით, “სპექტაკლში მონაწილეობას მხოლოდ იმის გამო დათანხმდა, რომ ოჯახის წევრები და მეგობრები ენახა ხოლმე”.
ამასთან, მერაბიშვილის თქმით, მას აქვს ინფორმაცია, რომ მატროსოვის ციხეში გრძელვადიანი პაემნების საშუალება არ ექნება, თუმცა მიმართავს სასჯელასღრულების დეპარტამენტსა და პროკურატურას, რომ ოჯახის წევრებთან შეხვედრის საშუალებას თუ მისცემენ იგი მადლობელი იქნება.
მერაბიშვილის თქმით, მისი უფლებები ციხეშიც ირღვევა, თუმცა საკუთარი უფლებებისთვის იბრძოლებს.
“ცხრა თვეა სპექტაკლის მონაწილეები ვართ, სადაც მოსამართლეს, ადვოკატებს, პროკურორებს და მე, როგორც ბრალდებულს, ჩვენ ჩვენი როლები გვაქვს. ერთადერთი ვისაც ამ დარბაზში როლები არ აქვს, ჩემი მეგობრები, ნათესავები და ოჯახის წევრები არიან, რომლებსაც რაღაც მტკიცებულებებსა და ჩვენებებზე უჩნდებათ განცდა, რომ რამე შეიცვლება. ეს არის გულუბრყვილო განცდა და თქვენს მიერ გამოტანილი განაჩენი იქნება არა ჩემი განაჩენი, არამედ თქვენი პირადი განაჩენი”, – მიმართა მოსამართლეს ვანო მერაბიშვილმა.
მან ადვოკატებს ბოდიში მოუხადა მის გადაწყვეტილებასთან დაკავშირებით და აღნიშნა, რომ თეთრი ალამი უახლოეს პერიოდში საქალაქო სასამართლოს თავზეც აღიმართება.
“მინდა ვუთხრა ჩემი ოჯახის წევრებსა და მშობლებს, რომ კომფორტულად ვარ იმ საკანში, სადაც ვიმყოფები და ნუ ინერვიულებენ. მაპატიონ თუ რამე დააკლდებათ, შევეცდები, როდესაც გავთავისუფლდები ეს დანაკლისი ყველას წინაშე ავანაზღაურო. მე ვიქნები ყველაზე უბედური თუ კი თავისუფალი ვიქნებოდი, რადგან ჩემი მეგობრები ან ციხეში, ან ზეწოლის ქვეშ იმყოფებიან. ვარ ყველაზე კარგად როგორც შეიძლება იყოს “ნაციონალური მოძრაობის” წარმომადგენელი. მინდა მოვუწოდო ჩემს მეგობრებს გაუძლონ და მიიყვანონ 2003 წელს დაწყებული საქმე ბოლომდე”, – აღნიშნა ვანო მერაბიშვილმა და სასამართლო სხდომა დატოვა.
დარბაზის მონაწილეებმა ის ტაშით გააცილეს.
21.02.14
