თიბისი ბანკმა” სიცრუისა და სიყალბის წინააღმდეგ კამპანია დაიწყო. როგორც “თიბისი ბანკის” სამეთვალყურეო საბჭოს თავმჯდომარემ , მამუკა ხაზარაძემ დღეს გამართულ პრესკონფერენციაზე განაცხადა, ადგილი აქვს შეურაცხმყოფელ კამპანიას პირადად მისი და ბანკის მიმართ.
“ჩემთვის და ჩემი ბანკისთვის მიუღებელია ფორმა, როდესაც არა შინაარსობრივი და არა კონკრეტულ ფაქტებზე დაყრდნობილი მსჯელობა მიდის, არამედ მიდის შეურაცხყოფა, ცილისწამება, უაპელაციო ბრალდება. კატეგორიული წინააღმდეგი ვარ იმ ტონისა და შეურაცხყოფისა, რომლითაც მე მომმართავენ. მე ამას ვერ მივიღებ. ეს სცილდება ჩემს ბიზნესს. ეს ეხება ჩემს ღირსებას. მინდა გითხართ, რომ ჩემი და ჩემი ორგანიზაციის ღირსება ყველაზე მაღალ დონეზე მყავს დაყენებული. მინდა ყველას მივმართო, ვისაც ასეთი ჩანაფიქრი აქვს, ამ ტონით ნუ დაგველაპარაკება “, – განაცხადა ხაზარაძემ და აქვე აღნიშნა, რომ ამ ყველაფრის წინააღმდეგ ყველანაირ სამართლებრივ და ცივილურ ხერხს გამოიყენებს.
ხაზარაძემ ორ კომპანიაზე _ “გუდვილზე” და “ელიტ ელეტრონიქსზე” და “ასავალ დასავალში” გამოქვეყნებულ მასალაზე ისაუბრა.
მისი ინფორმაციით, 2003 წლიდან 2013 წლამდე, ბანკმა ჯამში “გუდვილს” 80 მილიონი ლარი მისცა.
“2013 წელს ირკვევა, რომ “გუდვილს” პრობლემები აქვს. მიუხედავად იმისა, რომ კომპანია სერიოზულ პრობლემებშია, “თიბისი ბანკი” აკეთებს სამ სერიოზულ ნაბიჯს: უზრდის საბრუნავ სახსრებს, რომ კომპანია არ გაჩერდეს; უჩერებს პროცენტის გადახდას და 80% მთლიანი თანხის გადააქვს ქონებაში დავალიანების შემცირების გამო, იმ პირობით, რომ დამფუძნებელს და კომპანიას მისი დაბრუნება შეუძლია თავის მფლობელობაში”, – განაცხადა ხაზარაძემ.
მისივე თქმით, მას პრეტენზია არ აქვთ “გუდვილის” თანამშრომლებთან, პრეტენზია აქვთ მენეჯმენტთან და მის დამფუძნებლებთან.
“ეტყობა ზედმეტი ნდობა გამოიჩინა ბანკმა. ვენდობოდით მათ მიერ წარმოდგენილ აუდიტორულ დასკვნებს. მოხდა მარტივი რაღაც, 2013 წელს, როდესაც ჩვენ შევამჩნიეთ, რომ სერიოზული კრიზისია, უკვე ვხვდებით, რომ გამოსავალი არ აქვს “გუდვილს”. ამ დროს მოდის ჩემთან მისი დამფუძნებელი და აცხდაებს, რომ 2 წლის განმავლობაში ისინი “თიბისი ბანკს” გაყალბებულ დოკუმენტაციას აწვდიდნენ”, – განაცხადა ხაზარაძემ.
მისი თქმით, “გაბითურებას და მოტყუებას არავის აპატიებს”. “ჩვენ ვერავის ვერ გავატანთ ყალთბანდური გზით იმ თანხას, რომელსაც ჩვენ გავცემთ”, -განაცხადა ხაზარაძემ.
რაც შეეხება “ელიტ ელექტრონიქსთან” დაკავშირებით ანზორ ქოქოლაძის ბრალდებებს, როგორც ხაზარაძემ აღნიშნა, საქმე აქაც სერიოზულ გაყალბებებს და ფინანსურ მაქინაციებს უკავშირდება.
“2005 წელს “თიბისი ბანკმა” დაიწყო “ელიტ ელექტრონიქსის” დაფინანსება. 2009 წელს ოთხმა წამყვანმა ქართულმა ბანკმა გააგრძელა მისი დაფინანსება. ვერც ერთ განცხადებაში და სტატიაში ვერ ნახავთ სხვა ბანკების ხსენებას, სულ არის “თიბისი ბანკის” ლანძღვა ქოქოლაძის მიერ”, – აღნიშნა ხაზარაძემ.
მისი თქმით, 2009 წელს დაიწყეს კომპანიის რეაბილიტაციის რეჟიმი, ხოლო 2010 წელს მოხდა ქოქოლაძის გადაყენება დირექტორობიდან.
როგორც ხაზარაძემ აღნიშნა, ამ გადაყენებს წინ უძღოდა მისი შეხვედრა ქოქოლაძესთან, სადაც უთხრა, რომ აქციები, რომელიც დროებით გადასული იყო “თიბისი ბანკის” მფლობელობაში, ნებისმიერ დროს დაუბრუნდებოდა უკან, თუ მოხდებოდა თანხის გადახდა.
“ეს იყო ერთი პირობით, მე მას შევთავაზე გადამდგარიყო დირექტორობიდან, რამეთუ ჩვენ ეჭვი გვეპარებოდა, რომ კომპანიაში მისი ხელმოწერებით ხდებოდა არასწორი მართვა” , – განაცხადა ხაზარაძემ.
მისი თქმით, ამ შემთხვევაში, მისი მოთხოვნა არ იქნება მხოლოდ ცილისწამების შეჩერებაზე, არამედ – პასუხისგებაზე ფინანსური დარღვევების მიმართ.
რაც შეეხება “ასავალ დასავალს”, როგორც ხაზარაძემ აღნიშნა, ზემოთაღნიშნული ორი შემთხვევის მსგავსად, გაზეთში დაწერილ ცილიმსწამებლურ სტატიებზეც პროკურატურაში სარჩელია შეტანილი.
მისი თქმით, თუ მათ წინააღმდეგ იქნება ცილისმწამებლური და შეურაცხმყოფელი კომპანია, აქვთ ყველანაირი რესურსი და ჰყავთ კვალიფიციური ადვოკატები, რომლებიც შესაბამის ნაბიჯებს გადადგამენ.
“მე და ჩემი პარტნიორები ვაკეთებთ საერთაშორისო ბიზნესს. ყველა ბიზნესი, რომელიც “თიბისი ჯგუფშია”, არის საერთაშორისო ნიშნით შექმნილი. თითქმის არ არსებობს კომპანია, სადაც ჩვენ უცხოელი, რეპუტაციული ინვესტორი არ გვყავდეს. ამიტომ, ჩვენ ვერავის ვერ ვაპატიებთ. ეს არის სერიოზული თემა, რომელიც ეხება მთლიანად ქართული ბიზნესის რეპუტაციას. ჩვენ ვართ ერთ- ერთი წარმატებული ხმა ქართულ ბიზნესში და არავის არ მივცემთ უფლებას, ჩვენმა პარნტორებმა თუნდაც ირიბად მაინც დასვას კითხვა – რა არის ეს არის? რატომ გაყენებენ შეურაცხყოფას”, – განაცხადა ხაზარაძემ.
28.02.14
