2014 წლის თებერვალში წინა თვესთან შედარებით საქართველოში ინფლაციის დონემ 0,2 პროცენტი შეადგინა. როგორც “თბილისი თაიმსს” საქსტატიდან აცნობეს , მოცემულ პერიოდში ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:
ჯანმრთელობის დაცვა – მოცემულ პერიოდში დაფიქსირდა ფასების მატება 1,7 პროცენტით, რაც თებერვლის თვის ინფლაციის მთლიან მაჩვენებელზე 0,17 პროცენტული პუნქტით აისახა. აღსანიშნავია ფასების ზრდა სამედიცინო პროდუქციის, აპარატურისა და მოწყობილობების ქვეჯგუფზე (6,7 პროცენტი);
ფასები გაიზარდა ასევე სასტუმროების, კაფეებისა და რესტორნების ჯგუფზე 1,6 პროცენტით. შესაბამისად, ჯგუფის წვლილმა თებერვლის თვის ინფლაციაში 0,09 პროცენტული პუნქტი შეადგინა.
ფასები გაიზარდა ღამის გასათევით მომსახურების ქვეჯგუფზე (2,5 პროცენტი) და საზოგადოებრივი კვების ქვეჯგუფზე (1,6 პროცენტი).
საქსტატის ინფორმაციით, 2014 წლის თებერვალში 2013 წლის თებერვალთან შედარებით ინფლაციის დონემ საქართველოში 3,5 პროცენტი შეადგინა. სურსათისა და უალკოჰოლო სასმელების ჯგუფში ფასები გაიზარდა 5,7 პროცენტით, რამაც წლიური ინფლაციის მთლიან მაჩვენებელზე 1,73 პროცენტული პუნქტით მოახდინა გავლენა. ჯგუფში ფასების მნიშვნელოვანი ზრდა დაფიქსირდა ბოსტნეულსა და ბაღჩეულზე (46,6 პროცენტი). ფასები გაიზარდა ასევე რძის, ყველისა და კვერცხის ქვეჯგუფზე (4,2 პროცენტი) და თევზეულზე (2,9 პროცენტი). ამასთან, ფასები შემცირდა ზეთსა და ცხიმზე (-4,2 პროცენტი) და ხილისა და ყურძნის ქვეჯგუფზე (-3,2 პროცენტი);
საცხოვრებელი, წყალი, ელექტროენერგია, აირი – მოცემულ ჯგუფში დაფიქსირდა ფასების 9,3- პროცენტიანი მატება, რამაც წლიური ინფლაციის მთლიან მაჩვენებელში 0,77 პროცენტული პუნქტი შეიტანა. ფასები გაიზარდა საცხოვრებლის მიმდინარე მოვლა-შეკეთებაზე (9,4 პროცენტი); ალკოჰოლური სასმელების, თამბაქოს ჯგუფზე ფასები გაიზარდა 7,7 პროცენტით, რაც თებერვლის თვის წლიურ ინდექსზე 0,40 პროცენტული პუნქტით აისახა. ფასების მატება დაფიქსირდა თამბაქოს ნაწარმზე (14,2 პროცენტი).
04.03.14
