საქართველოს ეროვნული ბანკის პრეზიდენტის, გიორგი ქადაგიძის შეფასებით, მთავრობის პროგნოზი 5-პროცენტიანი ეკონომიკური ზრდის შესახებ რეალისტურია.
როგორც ქადაგიძემ ჟურნალისტებს დღეს განუცხადა, აღნიშნულის მიღწევა შესაძლებელია, თუკი საგარეო ფაქტორებს გამოვრიცხავთ.
“ჩვენ ვფიქრობთ, რომ წელს 5-პროცენტიანი ზრდის მიღწევა სავსებით რეალისტურია. რა თქმა უნდა, არის რისკები, რომლებიც ძირითადად უკავშირდება გეოპოლიტიკურ მდგომარეობას – თითქმის ჩვენს ყველა მეზობელ ქვეყანაში, განსაკუთრებით უკრაინაში მიმდინარე მოვლენებს. ამან, რა თქმა უნდა, რაღაც ტიპის გავლენა შეიძლება იქონიოს ქართულ ეკონომკაზე. თუ გამოვრიცხავთ საგარეო ფაქტორებს, წმინდა ეკონომიკური პროგნოზის თვალსაზრისით, 5 პროცენტიანი ზრდის მიღწევა სავსებით შესაძლებელია”, – განაცხადა ქადაგიძემ.
რაც შეეხება კითხვას, რამდენად იქონია უკრაინაში მიმდინარე მოვლენებმა აღნიშნული ქვეყნიდან შემოსული ფულადი გზავნილების რაოდენობაზე გავლენა, საქართველოს ეროვნული ბანკის პრეიდენტის თქმით, ჯერჯერობით შესაბამისი ინფორმაცია არ აქვთ.
“რა თქმა უნდა, ვაკეთებთ შეფასებას, რა შედეგი შეიძლება იქ მიმდინარე მოვლენებმა მოახდინოს ქართულ ეკონომიკაზე, თუმცა ეს მონაცემები გვექნება პირველი კვარტლის დასრულების შემდეგ. ამასთან დაკავშირებით სწორედ ამის მერე შევძლებთ გავაკეთოთ კომენტარი”, – აღნიშნა ეროვნული ბანკის პრეზიდენტმა.
07.03.14
