საგარეო საქმეთა მინისტრის, მაია ფანჯიკიძის განცხადებით, ბიძინა ივანიშვილმა შეასრულა თავისი დანაპირები, რომ იქნებოდა ობიექტურად კრიტიკული. ამის შესახებ მაია ფანჯიკიძემ “საქართველოს მთავრობის ღია მმართველობის” ფარგლებში გამართულ პრესკონფერენციაზე განაცხადა, როდესაც ყოფილი პრემიერ-მინისტრის, ბიძინა ივანიშვილის მიერ გიორგი მარგველაშვილთან დაკავშირებით გაკეთებულ განცხადებას გამოეხმაურა.
“ივანიშვილმა პრემიერ-მინისტრის პოსტიდან წასვლამდე დიდი ხნით ადრე გამოაცხადა, რომ აპირებდა სამოქალაქო სექტორში გადანაცვლებას და იქედან ძალიან აქტიურ მუშაობას. მან განაცხადა, რომ არ მოერიდებოდა მთავრობის კრიტიკას, რომელიც მისი გუნდისაგან შედგება. ივანიშვილმა ეს პირობა შეასრულა, ბევრს ალბათ არ სჯეროდა, რომ ეს ასე იქნებოდა. მან ბევრი მიმართულებით გამოთქვა კრიტიკა, მას შემდეგ რაც გადავიდა სამოქალაქო სექტორში. მე ვფიქრობ, ეს არის კიდევ ერთი სიახლე, რომელიც შესთავაზა საქართველოს პოლიტიკურ ცხოვრებას”, – განაცხადა მაია ფანჯიკიძემ.
მისივე თქმით, ბიძინა ივანიშვილის განცხადებით, ის არის ხელისუფლების წარმომადგენელი და შესაბამისად, მისი ფუნქცია არ არის აკრიტიკოს მისი კოლეგები და ხელისუფლება. “ალბათ, იმედი მაქვს, თქვენ გაგებით მოეკიდებით იმ ფაქტს, რომ მე მეტ კომენტარს ამ საკითხზე ვერ გავაკეთებ”, – დასძინა მაია ფანჯიკიძემ.
19.03.14
