საქართველოს ფინანსთა სამინისტროს საგამოძიებო სამსახურის თანამშრომლებმა, ქრთამის აღების ფაქტზე, ხაშურის მუნიციპალიტეტის გამგეობის არქიტექტურისა და ადმინისტრაციული ზედამხედველობის სამსახურის უფროსი, ჯემალ ხვედელიძე დააკავეს.
შემოსავლების სამსახურის ცნობით, გამოძიებით დადგენილია, რომ ჯემალ ხვედელიძემ, ხაშურის მუნიციპალიტეტში მდებარე მიწის ნაკვეთზე, სასტუმროს მშენებლობისთვის საჭირო პროექტის მომზადების და სამშენებლო ნებართვის მიღებაში დახმარების სანაცვლოდ, მოქალაქისაგან ქრთამის სახით, 4 000 აშშ დოლარი აიღო.
მიმდინარეობს გამოძიება საქართველოს სისხლის სამართლის კოდექსის 338-ე მუხლის პირველი ნაწილით, რაც ითვალისწინებს თავისუფლების აღკვეთას 6 დან 9 წლამდე ვადით.
19.03.14
