საქართველოს პრეზიდენტმა გიორგი მარგველაშვილმა ზურაბ ჟვანიასა და რაულ უსუპოვის ცხედრების ამსახველი ფოტომასალის გავრცელებაზე კომენტარი გააკეთა.
დღეს, გარდაბანში ყოფნისას გიორგი მარგველაშვილმა განაცხადა, რომ საზოგადოებრივი ინტერესი არის არა მძიმე კადრების ნახვა, არამედ – გამოძიების დასრულება.
“მე შემიძლია, გითხრათ ერთი, რომ საზოგადოებრივი ინტერესი არის ამ ფაქტის გამოძიება. მე ვიცი, რომ მიმდინარეობს გამოძიება და ის მალე დასრულდება. საზოგადოებრივი ინტერესი არის არა მძიმე კადრების ნახვაში, არამედ გამოძიების დასრულებაში”, – განაცხადა გიორგი მარგველაშვილმა.
სოციალურ ქსელში გუშინ გავრცელდა ფოტოები სახელწოდებით – “სააკაშვილი მკვლელი”.
ფოტომასალაზე ასახულია საქართველოს ყოფილი პრემიერ-მინისტრის, ზურაბ ჟვანიასა და მასთან ერთად გარდაცვლილი რაულ უსუპოვის ცხედრები.
გავრცელებული ფოტოების მიხედვით, ცხედრებს სხვადასხვა სახის დაზიანება აღინიშნებათ.
ფოტომასალა youtube-ზე ჰაკიმ ფაშას სახელით არის ატვირთული.
20.03.14
