საქართველოში ინვესტიციების განხორციელების სურვილი კიდევ ერთმა კომპანიამ, ბრიტანულმა Global Project Capital-მა გამოთქვა. მასთან სამუშაო შეხვედრა დღეს საქართველოს რეგიონული განვითარებისა და ინფრასტრუქტურის სამინისტროში გაიმართა.
შეხვედრას ესწრებოდნენ კომპანიის წარმომადგენლები, საქართველოს რეგიონული განვითარებისა და ინფრასტრუქტურის მინისტრის მოადგილე, გიორგი სოლომონია და სამინისტროს სახელმწიფო კონტროლს დაქვემდებარებული კომპანიების წარმომადგენლები.
როგორც ბრიტანული კომპანიის წარმომადგენლებმა განმარტეს, ისინი დაინტერესებულნი არიან საქართველოში სხვადასხვა ინფრასტრუქტურული პროექტების განხორციელებით, ინვესტირებისა და ახალი ტექნოლოგიების შემოტანის გზით.
თავის მხრივ, ქართულმა მხარემ „Global Project Capital“-ს ინფორმაცია მიაწოდა საქართველოს რეგიონული განვითარებისა და ინფრასტრუქტურის სამინისტროს ძირითადიო მიმართულებების, ბიუჯეტისა და სხვა მნიშვნელოვანი საკითხების შესახებ. ყურადღება გამახვილდა იმ მიმდინარე და დაგეგმილ პროექტებზე, რომლის განხორციელებასაც სამინისტრო 2014 წლის განმავლობაში გეგმავს, როგორც საგზაო ინფრასტრუქტურის განვითარების კუთხით, ისე წყალმომარაგებისა და მყარი ნარჩენების მართვის მიმართულებით.
მხარეებმა გამოთქვეს ურთიერთთანამშრომლობის სურვილი და იმედი, რომ აღნიშნული თანამშრომლობა სამომავლოდ ორივე მხარისთვის სასარგებლო იქნება.
22.03.14
