სააკაშვილისთვის ჩვეული მეთოდია, საერთაშორისო დონის, მაღალი რანგის ჩინოვნიკები უხერხულ მდგომარეობაში ჩააყენოს, – ასე ეხმაურება საპარლამენტო უმრავლესობის წარმომადგენელი გიორგი ვოლსკი სააკაშვილის განცხადებას, რომლის თანახმადაც, მას ბაროზომ უთხრა, რომ მისი დაპატიმრების შემთხვევაში დარწმუნდება, რომ საქართველოს მთავრობას პუტინი აკონტროლებს.
როგორც ვოლსკი აცხადებს, მიხეილ საააკშვილი მსოფლიო ლიდერებს უხერხულ მდგომარეობაში ადგებს, რაც მისთვის ჩვეული მეთოდია.
“მისთვის ჩვეული მეთოდია, საერთაშორისო დონის, მაღალი რანგის ჩინოვნიკები უხერხულ მდგომარეობაში ჩააყენოს. ამას წინათ თქვა, რომ ამერიკის ვიცე-პრეზიდენტი დიკ ჩეინი როკის გვირაბის დაბომბვას დაპირდა, ახლა ბაროზოს გადაწვდა. აქვს ასეთი თვისებებები და გათვლაც, რაც შეიძლება მაღალ ჩინოვნიკებზე ილაპარაკოს. ადგილი აქვს სკანდალის აგორების მცდელობას. ვფიქრობ, ბაროზოსაც დაფიქრება მართებს, როცა ასეთ ადამიანებს დაელაპარაკება, არათუ მასთან რაიმე საკითხებს განიხილავს”, – განუცხადა ჟურნალისტებს ვოლსკიმ.
ხოსე მანუელ ბაროზომ მითხრა, როგორც კი შენი მთავრობა დაგაპატიმრებს, ვერავინ დამარწმუნებს, რომ ეს არ არის პუტინის მიერ კონტროლირებადი მთავრობაო , – ამის საქართველოს ყოფილმა პრეზიდენტმა მიხეილ სააკაშვილმა ტელეკომპანია “რუსთავი 2”-სთვის მიცემულ ინტერვიუში განაცხადა.
როგორც სააკაშვილმა აღნიშნა, შარშან ნოემბერში ბრიუსელის ინიციატივით ბრიუსელში მისი ორი ვიზიტი შედგა, ერთი იყო ევროპარლამენტში რომპეისთან და მეორე ევროკავშირის პრეზიდენტ ბაროზოსთან.
“ხოსე მანუელ ბაროზომ მითხრა, რომ როგორც კი შენი მთავრობა შენ დაგაპატიმრებს, ვერავინ დამარწმუნებს, რომ ეს არ არის პუტინის მიერ კონტროლირებადი მთავრობა და მე ვიქნები პირველი, ვინც დააყენებს საკითხს, რომ საქართველოს შემდგომი პროგრესი გაჩერდეს. ამიტომ, შენ უნდა გესმოდეს შენი როლი რა არის, თუ შენ მზად ხარ, რომ რაღაც პოლიტიკური მოსაზრებებით შეაჩერო სვლა ევროპისკენ, შენ შეგიძლია დარჩე საქართველოში და მაშინ აღმოჩნდები ციხეში და ნუ ჩვენც დავიბანთ ხელებს და საქართველოს პრაქტიკულად გადავაბარებთ პუტინს, ასე გამოუვიდა, ამ სიტყვებით არ უთქვამს. თუ არა და დროებით იქნებ გამოერიდო, რათა არ მისცე მათ ეს ცდუნება, რომ ეს გეგმა განახორციელონო”, – განაცხადა სააკაშვილმა.
26.03.14
