ხელების ჩამოშვების და ყურების ჩამოყრის არავითარი საფუძველი არ არსებობს, – ასე გამოეხმაურა ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ჟურნალისტებთან საუბარში ამერიკის შეერთებული შტატების პრეზიდენტის, ბარაკ ობამას განცხადებას.
როგორც ალექსი პეტრიაშვილმა აღნიშნა, ეს განცხადება არავითარ შემთხვევაში არ ეხება საქართველოსთვის მაპ-ის მინიჭების თუ არ მინიჭების საკითხს.
“რაც ყველაზე მთავარია, ყოველთვის ვაცხადებდით და დღესაც შემიძლია მთელი პასუხისმგებლობით განვაცხადო, ჩრდილოატლანტიკური ალიანსი, მისი ოცდარვავე წევრი და ნატო-ს ხელმძღვანელობა დარწმუნებულია და ერთსულოვანია იმაში, რომ საქართველოს მიერ განხორციელებული კონტრიბუცია საერთაშორისო უსაფრთხოების საკითხებში, საქართველოს მიერ მიღწეული პროგრესი დემოკრატიის კონსოლიდაციაში შესაბამისად ჯეროვნად უნდა იყოს ასახული ნატო-ს გადაწყვეტილებებში. ეს იქნება აუცილებლად პროგრესი, ეს იქნება აუცილებლად განსხვავებული ბუქარესტის სამიტის გადაწყვეტილებისგან და რა იქნება კონკრეტულად, ამას უახლოესი თვეების განმავლობაში საქართველოსთან კონსულტაციის საფუძველზე ნატო მიიღებს გადაწყვეტილებას. ასე რომ, ხელების ჩამოშვების და ყურების ჩამოყრის არავითარი საფუძველი არ არსებობს. ჩასაფრებულებს, იმედგაცრუებულებს შემიძლია ვუთხრა, რომ დაელოდონ, ყველაფერი წინ არის”, – განაცხადა ალექსი პეტრიაშვილმა.
აშშ-ის პრეზიდენტმა ბარაკ ობამამ გუშინ ბრიუსელში განაცხადა, რომ ნატოს დაუყოვნებელი გაფართოების გეგმა დღის წესრიგში არ დგას.
“არც უკრაინა და არც საქართველო ამჟამად არ დგანან ნატოში გაწევრიანების გზაზე. არ ყოფილა და არ არის ნატოს დაუყოვნებელი გაფართოების გეგმა”, – აღნიშნა აშშ-ის პრეზიდენტმა ამერიკა-ევროკავშირის სამიტთან დაკავშირებით გამართულ პრესკონფერენციაზე.
ობამას განცხადებით, რუსული მხარის შეშფოთების ერთ-ერთ მთავარ მიზეზს უკრაინის ნატოში შესაძლო გაწევრიანება წარმოადგენს, თუმცა, აშშ-ს პრეზიდენტის თქმით, უახლოეს მომავალში ეს არ იგეგმება.
მისივე თქმით, აშშ-სა და ევროკავშირს სურთ, ალიანსის არაწევრი ქვეყნებიდან მხარდაჭერა გაუწიონ იმ სახელმწიფოებს, რომლებიც იზიარებენ დასავლეთის პრინციპებს და იდეალებს. “ამიტომ ყველა ზომას მივმართავთ, რათა მხარი დავუჭიროთ უკრაინას – მის არჩევნებს, მის ეკონომიკას და გავაგრძელოთ რუსეთის იზოლაცია იმ ნაბიჯებზე საპასუხოდ, რომლებიც მან გადადგა”, – განაცხადა ბარაქ ობამამ ბრიუსელში ვიზიტისას.
27.03.14
