საქართველოს ეკონომიკისა და მდგრადი განვითარების სამინისტროში საქართველოს მაღალმთიანი რეგიონების განვითარების სახელმწიფო კომისიის სამუშაო შეხვედრა გაიმართა.
ეკონომიკის სამინისტროს ინფორმაციით, შეხვედრას ვიცე-პრემიერის, ეკონომიკის მინისტრ გიორგი კვირიკაშვილის გარდა ესწრებოდნენ რეგიონული განვითარებისა და ინფრასტრუქტურის მინისტრი დავით ნარმანია, პარლამენტის წევრები – მაღალმთიანი რეგიონების მაჟორიტარები, ასევე მეცნიერები და ექსპერტები.
სამინისტროს ინფორმაციით, შეხვედრის მონაწილეებმა საქართველოს მაღალმთიანი რეგიონების განვითარების სტრატეგიის, სახელმწიფო პროგრამის ძირითადი მიმართულებები და საკანონმდებლო ცვლილებებთან დაკავშირებული საკითხები განიხილეს. ასევე განისაზღვრა კომისიის ფარგლებში სამუშაო ჯგუფების შემადგენლობა.
კომისიის წევრთა განცხადებით, მუშაობა კომპლექსურად მიმდინარეობს რამდენიმე მიმართულებით – საკანონმდებლო ცვლილებების გარდა კომისია მუშაობს მაღალმთიანი რეგიონების ინფრასტრუქტურული და დარგობრივი განვითარების, ასევე სოციალურ საკითხებზე. მუშაობის პროცესში საზოგადოების წარმომადგენლები და შესაბამისი დარგის სპეციალისტები მომავალშიც აქტიურად იქნებიან ჩართულნი.
მაღალმთიანი რეგიონების განვითარების სახელმწიფო სტრატეგიაზე მუშაობის დასრულებას კომისია უკვე რამდენიმე თვეში გეგმავს. როგორც ეკონომიკის სამინისტროში აცხადებენ, ასევე ინტენსიურად მიმდინარეობს მუშაობა შესაბამის კანონპროექტთა პაკეტზეც, რომელიც პარლამენტში განსახილველად საშემოდგომო სესიაზე შევა.
28.03.14
