საქართველოს პრემიერ-მინისტრი ირაკლი ღარიბაშვილი შესაბამის უწყებებს დეპუტატ ნუგზარ წიკლაურის ცემის ფაქტის დროულად გამოძიებისკენ მოუწოდებს.
როგორც ირაკლი ღარიბაშვილმა ჟურნალისტებთან საუბარში განაცხადა, ეს ინფორმაცია დღეს მოისმინა.
“ეს, რა თქმა უნდა, არის აღმაშფოთებელი. მე მოვუწოდე შესაბამის უწყებებს, დროულად გამოიძიონ საქმე”, – აღნიშნა ირაკლი ღარიბაშვილმა.
რაც შეეხება “ნაციონალური მოძრაობის” წევრების განცხადებას, რომ ახალი მთავრობის პირობებში არ ხდება გამოძიებები, ღარიბაშვილმა განაცხადა, რომ ასეთი საქმეების გამოუძიებლობა სწორედ “ნაციონალური მოძრაობის” ხელისუფლების დროს ხდებოდა.
საქართველოს პრემიერ-მინისტრის თქმით, იგი მოუწოდებს ყველას, წინასწარი დასკვნებისგან თავი შეიკავონ.
საპარლამენტო უმცირესობის წევრ ნუგზარ წიკლაურს წუხელ ფიზიკურად გაუსწორდნენ. დეპუტატის თქმით, სახლთან სამი მანქანით რამდენიმე ნიღბიანი დახვდა, რომელთაც მისი გატაცება სცადეს. წიკლაურის თქმით, თავდამსხმელებმა ელექტროშოკიც გამოიყენეს. დეპუტატს დაზიანებები სახეზე აღენიშნება.
31.03.14
