საქართველოს პარლამენტის თავმჯდომარე დავით უსუფაშვილი ნატო-ს სექტმებრის სამიტიდან საქართველოსთვის სასარგებლო გადაწყვეტილების მიღებას ელოდება. თუ როგორი იქნება ფორმულირებული საქართველოსთვის სასარგებლო გადაწყვეტილება, ამაზე, დავით უსუფაშვილის თქმით, მუშაობა მიმდინარეობს.
“ამერიკის შეერთებული შტატების პრეზიდენტის განცხადება ჩემთვის და ყველა პოლიტიკოსისათვის კიდევ ერთი გაკვეთილია იმისა, რაოდენ ფრთხილად უნდა ვიყოთ, როდესაც ჟურნალისტებთან გვაქვს საქმე და მოსაზრებებს პრესკონფერენციებზე გამოვთქვამთ. მთელს ჩანაწერს გავეცანი და სრულიად აშკარაა, რომ ბატონი ბარაქ ობამა ნატო-ს მომავალ სამიტზე ნატო-ს გაფართოების შესაძლებობას თუ შეუძლებლობას გულისხმობდა. ამ თვალსაზრისით, მიმდინარე წლის სექტემბერში საქაერთველოს ნატო-ში გაწევრიანების მოლოდინი არც ობამას აქვს და არც ვინმეს მხრიდან გამოთქმულა. ამ ნაწილში ის ბრძანებდა, რომ დიახ, უკრაინის და საქართველოს ნატო-ში გაწევრიანება უახლოეს სამიტზე და უახლოეს თვეებში მოსალოდნელი არ არის და ეს არ არის რეალისტური. დანარჩენი, საჭირო განმარატებები გაკეთდა ამერიკის შეერთებული შტატების სახელმწიფო ადმინისტრაციისა და ამერიკის საელჩოს მხრიდან. ასე რომ, ამ თვალსაზრისით, რაიმე ცვლილება არსებულ ვითარებაში, პრეზიდენტ ობამას განცხადებაზე და განცხადების შემდეგ, არ შესულა”,-აღნიშნა საქართველოს პარლამენტის თავმჯდომარემ.
ამასთან, დავით უსუფაშვილის თქმით, რაც შეეხება მცდელობას, უფრო დაჩქარდეს ქვეყნის ნატო-ში ინტეგრაციის პროცესი, ამაზე მუშაობა გრძელდება
“უშუალოდ სექტემბრის სამიტიდან ჩვენ ველით საქართველოსთვის სასარგებლო გადაწყვეტილებებს. ამაზე თანხმდება ნატო-ს წევრი ყველა ქვეყანა. კონკრეტულად როგორი იქნება ფორმულირებული საქართველოსთვის სასარგებლო გადაწყვეტილება, ამაზე მიდის მუშაობა. ხვალაც იქნება მსჯელობა ბრიუსელში, მსჯელობა გაიმართება მინისტერიალზე და უშუალოდ ნატო-ს სამიტზე”, – განუცხადა ჟურნალისტებს დავით უსუფაშვილმა.
31.03.14
