ყატარის სავაჭრო-სამრეწველო პალატის წევრი 20 წამყვანი კომპანიის წარმომადგენელმა საქართველოში სხვადასხვა საინვესტიციო პროექტების განხორციელების სურვილი გამოთქვა.
პრემიერის პრესსამსახურის ცნობით, დღეს, ირაკლი ღარიბაშვილი ყატარის ბიზნეს დელეგაციის წევრებს შეხვდა.
ირაკლი ღარიბაშვილმა სტუმრებს მადლობა გადაუხადა საქართველოში ვიზიტისთვის და იმედი გამოთქვა, რომ ახლო მომავალში ორ ქვეყანას შორის ურთიერთობა უფრო მჭიდრო და მრავლისმომცველი გახდება.
შეხვედრაზე საუბარი შეეხო ორმხრივი თანამშრომლობის გაღრმავების პერსპექტივებს. განსაკუთრებული ყურადღება დაეთმო სავაჭრო-ეკონომიკურ და საინვესტიციო საკითხებზე მსჯელობას.
საქართველოს პრემიერ–მინისტრმა ყატარის დელეგაციას ქართული საინვესტიციო გარემო გააცნო. მისი განცხადებით, საქართველო ინვესტიციით დაინტერესებულ ბიზნესის წარმომადგენლებსა და სხვადასხვა კომპანებს სთავაზობს ბიზნესშესაძლებლობების ფართო არჩევანს ქვეყნის ისეთ სწრაფად მზარდ სექტორებში, როგორებიცაა ჰიდროენერგეტიკა, სოფლის მეურნეობა, ტურიზმი და უძრავი ქონება, მრეწველობა, რეგიონალური სერვისების ჰაბი, ლოჯისტიკა.
მანვე ყურადღება გაამახვილა ქვეყანაში არსებულ სტაბილურ მაკროეკონომიკურ გარემოსა და ლიბერალურ საგადასახადო სისტემაზე. ამასთან ხაზი გაუსვა საქართველოს განსაკუთრებულ და ხელსაყრელ ადგილმდებარეობას.
დელეგაციის შემადგენლობაში იმყოფებიან ყატარის სავაჭრო-სამრეწველო პალატის წევრი 20 წამყვანი კომპანიის მაღალი რანგის წარმომადგენლები. დელეგაციას ხელმძღვანელობს სავაჭრო-სამრეწველო პალატის დირექტორთა საბჭოს წევრი და ყატარში ერთ-ერთი უმსხვილესი კონგლომერატის, Al Baida Group-ის თავმჯდომარე ალი ალ მისნადი.
01.01.14
