საქართველოს პარლამენტის თავმჯდომარე, დავით უსუფაშვილი ნიდერლანდების სამეფოს პარლამენტის წარმომადგენლობითი პალატის სპიკერს , ანუშკა ვან მილტნბურგსა და სენატის სპიკერს, ანკი ბროკერს-ნოლის შეხვდა.
საქართველოს პარლამენტის ინფორმაციით, შეხვედრებზე მხარეებმა, ძირითადად, რეგიონში არსებული სიტუაცია განიხილეს, განსაკუთრებული ყურადღება კი ბოლო დროს უკრაინაში განვითარებულ მოვლენებს დაეთმო.
როგორც დავით უსუფაშვილმა აღნიშნა, “უკრაინაში განვითარებული მოვლენების ფონზე, რუსეთის შემდეგი სამიზნე, შესაძლოა, საქართველო გახდეს, ამიტომაც საჭიროა ევროკავშირმა რუსეთთან მიმართებაში უფრო მკვეთრი ნაბიჯები გადადგას”.
ორმხრივ შეხვედრებზე საუბარი ასევე შეეხო ნატო-ს მომავალ სამიტს. ქართული მხარის მხრიდან აღინიშნა, რომ “ჩვენს ქვეყანაში დიდია მოლოდინი აღნიშნულ სამიტზე საქართველოსთვის სასარგებლო გადაწყვეტილებების მიღებისა”.
,,ჩვენ სრულად ვიზიარებთ საქართველოს მისწრაფებებს ევროკავშირში ინტეგრაციასთან დაკავშირებით და ვიწონებთ თქვენს ხედვას და პოზიციას რეგიონში არსებულ პრობლემებთან მიმართებაში”, – განაცხადა შეხვედრის დასასრულს ნიდერლანდების სამეფოს პარლამენტის სენატის თამჯდომარემ.
საქართველოს პარლამენტის თავმჯდომარესთან გამართულ შეხვედრებზე ნიდერლანდების სამეფოს პარლამენტის ორივე სპიკერმა გამოთქვა მზადყოფნა, მათ ხელთ არსებული ყველა შესაძლო საშუალებებით დაეხმარონ საქართველოს შექმნილი რთული ვითარების დაძლევაში.
09.04.14
