საქართველოს დელეგაციის წევრმა, ლევან ბერძენიშვილმა PACE-ს რუსეთისთვის უფლებამოსილების შეჩერებისკენ მოუწოდა.
ბერძენიშვილმა ევროპის საბჭოს საპარლამენტო ასამბლეის სესიაზე სიტყვით გამოსვლისას ყურადღება გაამახვილა იმ ფაქტზე, რომ რუსეთს არ სურს ევროპელი კოლეგების რჩევების მოსმენა.
“მე წარმოვადგენ ქვეყანას, რომელმაც ყველაზე უკეთ იცის, რას ნიშნავს რუსეთთან მეზობლობა. მე მოვისმინე მოსაზრებები, რომ ისინი აქ უნდა იყვნენ, რათა რაღაც ისწავლონ. ეს ძალიან საინტერესო აზრია, მე ეჭვი არ მეპარება PACE-ს და ევროპელი ლიდერების პედაგოგიურ შესაძლებლობებში, მაგრამ სწავლის პროცესს ორი მონაწილე სჭირდება _ მასწავლებელი და მოსწავლე. ჩვენ აქ ველოდებოდით მომავალ მოსწავლეებს – ბატონ პუშკოვს, სლუცკის და სხვებს, მაგრამ ისინი არ არიან, არ უნდათ სწავლა. კარგია, რომ გვინდა, მათ ვასწავლოთ, მაგრამ მათ არ უნდათ, ისწავლონ”, – განაცხადა ბერძენიშვილმა.
მისივე თქმით, ამ შემთხვევაში დღის წესრიგში დგას არა რუსეთის საპარლამენტო ასამბლეაში ყოფნა-არყოფნის, არამედ თავად ევროსაბჭოს საპარლამენტო ასამბლეის ღირსების საკითხი.
“ისინი ზურგს გვაქცევენ და არ უნდათ მოგვისმენ. ახლა როცა მათზე ვმსჯელობთ, თავად ინტერვიუს აძლევენ და ამაყობენ იმით, რომ მიუფურთხებიათ იმისთვის, იქნებიან თუ არა ევროსაბჭოს საპარლამენტო ასამბლეის წევრები. ამიტომ, მოგიწოდებთ, უფლებამოსილება შეუჩეროთ რუსეთს, არ ითანამშროლოთ და არ იყოთ სოლიდარულები აგრესორის მიმართ”, – განაცხადა ლევან ბერძენიშვილმა.
შეგახსენებთ, რომ ევროპის საბჭოს საპარლამენტო ასამლეა დღევანდელ სხდომაზე რუსეთისთვის ხმის მიცემის უფლების შეჩერების ან რუსეთის დელეგაციისთვის უფლებამოსილების შეწყვეტაზე მსჯელობს.
რუსეთის დელეგაცია საკითხის განხილვას არ ესწრება.
10.04.14
