საქართველოს რეგიონული განვითარებისა და ინფრასტრუქტურის მინისტრი ელგუჯა ხოკრიშვილი მოვალეობის შესრულებას შეუდგა.
დღეს ელგუჯა ხოკრიშვილი სამინისტროს თანამშრომლებს შეხვდა. საქართველოს რეგიონული განვითარებისა და ინფრასტრუქტურის მინისტრად ელგუჯა ხოკრიშვილი საქართველოს პრემიერ-მინისტრმა გუშინ წარადგინა.
ელგუჯა ხოკრიშვილი დაიბადა 1973 წლის 24 მაისს. 2002 წელს მიიღო ბაკალავრის ხარისხი გერმანიაში, პოტსდამის უნივერსიტეტში. 2004 წელს გახდა ამავე უნივერსიტეტის ბიზნესისა და ეკონომიკის მაგისტრი; 2008 წელს – ეკონომიკურ და სოციალურ მეცნიერებათა დოქტორი.
მინისტრის პოსტის დაკავებამდე, ელგუჯა ხოკრიშვილი მუშაობდა საქართველოს მუნიციპალური განვითარების ფონდის აღმასრულებელ დირექტორად. 2012 წელს იყო კავკასიის ეკონომიკისა და სოციალური კვლევების ინსტიტუტის (CIESR) გამგეობის თავმჯდომარე, ფონდ „ღია საზოგადოების“ (OSF) ექსპერტი, ილიას სახელმწიფო უნივერსიტეტის ლექტორი.
2011 წელს ელგუჯა ხოკრიშვილი იყო „GOPA კონსალტინგის“ (გერმანია) ექსპერტი, ასევე – ფონდ „ღია საზოგადოება – საქართველოს“ ექსპერტი; 2010-2011 წლებში მუშაობდა კონსულტანტად პროგრამებისა და განათლების განვითარების პროფესიონალთა ჯგუფში (ვანკუვერი, კანადა), პროექტების მმართველად ბერლინის უნივერსიტეტში.
2004-2008 წლებში ელგუჯა ხოკრიშვილი იყო პროექტების მმართველი პოტსდამის უნივერსიტეტის ფინანსების კათედრაზე; 2006 წელს – ექსპერტი გერმანიის ეკონომიკური თანამშრომლობის ფედერალურ სამინისტროში (ბერლინი); 1999-2003 წელს – ამავე კათედრის მკვლევარი მეცნიერი.
ელგუჯა ხოკრიშვილს გამოქვეყნებული აქვს 20-ზე მეტი პუბლიკაცია საგადასახადო და სოციალური პოლიტიკის, ფისკალური დეცენტრალიზაციის, ადგილობრივი თვითმმართველობის რეფორმებისა და რეგიონული ეკონომიკური განვითარების სტრატეგიების შესახებ ქართულ, ინგლისურ და გერმანულ ენებზე.
15.04.14
