დღეს არის ორი ქვეყანა, სადაც მე ჩასვლის პრობლემა მაქვს – რუსეთის ფედერაცია და საქართველო, – ამის შესახებ საქართველოს ყოფილმა პრეზიდენტმა მიხეილ სააკაშვილმა მისი ინიციატივით შექმნილი ბიბლიოთეკის გახსნაზე, ამერიკიდან ვიდეოჩართვისას განაცხადა. ყოფილი პირველი პირის განმარტებით, შავ სიაში მისი ყოფნა იმაზე მალე დამთავრდება, ვიდრე “ივანიშვილს წარმოუდგენია”. “ადრე იყო სამი ქვეყანა, სადაც ჩასვლის პრობლემა მქონდა. მესამე იყო უკრაინა, მაგრამ იქ შავმა სიამ გასტანა ზუსტად 2 თვეს. საქართველოშიც ეს დამთავრდება ბევრად უფრო მალე, ვიდრე ივანიშვილს წარმოუდგენია. რუსეთში ჩასვლის სურვილი არც მაქვს, მაგრამ საქართველოს, რა თქმა უნდა, ეკუთვნის ჩემი გული. საქართველოში ჩემი ყოფნა დღეს არის ეს ბიბლიოთეკა. სამწუხაროა, რომ ორი ქვეყანა – საქართველო და რუსეთი სინქრონში მოქმედებს. ეს, რა თქმა უნდა, დასაფიქრებელი, სამწუხარო და პირადად ჩემთვის მტკივნეულია. მაგრამ ეს ყველაფერი დროებითია”, – აღნიშნა სააკაშვილმა. ყოფილი პრეზიდენტი დარწმუნებულია, რომ “ჩვენ ერთად მუშაობას და ადგილზე აღმშენებლობას გავაგრძელებთ”. 22.04.14
