ფინანსთა სამინისტროს მიერ გამოქვეყნებულ მენიუზე, რომლითაც უწყება აზიის განვითარების ბანკის ფორუმის სტუმრების გამასპინძლებას აპირებს, პირველი კომენტარი დღეს მინისტრმა გააკეთა.
“ჩვენ ერთი რამ უნდა ვისწავლოთ, საქართველო სტუმარ-მასპინძლის ქვეყანაა. ასეც რომ არ იყოს, არსებობს პროტოკოლი, არსებობს უამრავი წესი. ეს ადამიანები არ არიან ფინანსთა მინისტრის პირადი სტუმრები, არიან ქვეყნის სტუმრები და ქვეყანაზე უნდა დარჩეს შთაბეჭდილება. რაც უფრო მეტი ასეთი ფორუმი ჩატარდება საქართველოში, საქართველოს ავტორიტეტისათვის, ქვეყნის ცნობადობის ზრდისათვის არის ძალიან კარგი. მოდით, ვისაუბროთ პრობლემებზე, რომელიც არსებობს და იმაზე, თუ როგორ უნდა გადავჭრათ ის”, – განუცხადა ჟურნალისტებს ნოდარ ხადურმა.
ამასთან, თავდაპირველად ფინანსთა მინისტრმა აღნიშნული საკითხის კომენტირებისაგან თავი შეიკავა და ჟურნალისტებს უთხრა, რომ მენიუს გამოქვეყნება ფინანსთა სამინისტროს პრესასთან ურთიერთობის სამსახურმა საკმარისად დაასაბუთა.
ფინანსთა სამინისტრო 23 აპრილისთვის დაგეგმილი აზიის განვითარების ბანკის სახელმწიფო ვალის მართვის რეგიონული ფორუმის ოფიციალური მიღების მენიუს აქვეყნებს.
ფინანსთა სამინისტრო დაინტერესებულ მხარეებს სთავაზობს, საკუთარი შეხედულებისამებრ შეიტანონ მასში შესწორებები. როგორც სამინისტროში განმარტავენ, მენიუს გამოქვეყნების გადაწყვეტილება მიღებულია გამომდინარე იქიდან, რომ მიზანმიმართულად არ მთავრდება საუბარი ფინანსთა სამინისტროს მიერ გაწეული წარმომადგენლობითი ხარჯების თაობაზე.
მენიუ 120 კაცზე (ერთი ფასი): 1. კიტრისა და პომიდვრის სალათი – 3 ლარი; 2. ქათმის სალათი – 3.50 ლარი; 3. სალათი “ოლივიე” – 4.00 ლარი; 4. ქათმის ღვიძლის სალათი – 5.30 ლარი; 5. ბადრიჯანი ნიგვზით – 4.50 ლარი; 6. ყველის ასორტი – 7 ლარი; 7. ნადუღი სულგუნში – 4.00 ლარი; 8. მწნილის ასორტი – 4.00 ლარი; 9. ზეთისხილი – 2.00 ლარი; 10. ხბოს მწვადი – 12.00 ლარი; 11. საქონლის ხორცის წვნიანი (ოსტრი) – 7.50 ლარი; 12. ქათმის ღვიძლი კეცზე – 3.50 ლარი; 13. შემწვარი კარტოფილი (გლეხურად) – 3.50 ლარი; 14. სოკო კეცზე – 5.00 ლარი; 15. ხორცის ბლინები – 4.00 ლარი; 16. ლობიო ქოთანში ნიგვზით – 4.50 ლარი; 17. შემწვარი კალმახი – 6.00 ლარი; 18. თევზი ქინძმარში – 13.00 ლარი; 19. შემწვარი ქათამი – 17.50 ლარი; 20. იმერული ხაჭაპური – 6.50 ლარი; 21. პური – 0.75 ლარი; 22. მჭადი – 1.00 ლარი; 23. ლიმონათი – 1.50 ლარი; 24. ბორჯომი – 1.40 ლარი; 25. ღვინო “წარაფი” – 1ლ – 4.50 ლარი.
ყოველწლიური შეხვედრის ფარგლებში, ოფიციალური ღონისძიებების გარდა,საქართველოს ფინანსთა სამინისტრო ქართული კულტურის წარმოსაჩენად და 120 სტუმრის პატივსაცემად, გეგმავს ანსამბლ “რუსთავის” მოწვევას და ოფიციალური მიღების გამართვას.
“მენიუს ვარიანტი გამოქვეყნებულია ფინანსთა სამინისტროს ვებ-გვერდზე www.mof.ge, აგრეთვე, ფინანსთა სამინისტროს Facebook-ის ოფიციალურ გვერდზე.
ამიერიდან,ფინანსთა სამინისტრო გამოგზავნილი წინადადებების გათვალისწინებით გაუმასპინძლდება სტუმრებს, რომლებიც პირველად არიან ქვეყანაში – არ იცნობენ ქვეყნის კულტურას, ტრადიციებს და ქართულ სამზარეულოს. ფინანსთა სამინისტროს გადაწყვეტილებით, მომავალშიც წინასწარ გამოაქვეყნდება ოფიციალური დელეგაციების პატივსაცემად გასამართი მიღებების მენიუები, რათა ერთხელ და სამუდამოდ, შეწყდეს სამინისტროს წინააღმდეგ დაგეგმილიმიზანმიმართული და სამარცხვინო კამპანია”, – აცხადებენ სამინისტროში.
ფორუმი 23-25 აპრილს გაიმართება. ფორუმში მონაწილეობს 120 წარმომადგენელი 35 ქვეყნიდან. ფორუმის მასპინძლები არიან საქართველოს ფინანსთა სამინისტრო და აზიის განვითარების ბანკი.
23.04.14
