იმ შემთხვევაში, თუ რუსეთი უკრაინის წინააღმდეგ ახალ ქმედებებს განახორციელებს, ევროკავშირი სანქციების შემდეგ ეტაპზე გადავა , – ამის შესახებ საფრანგეთის საგარეო საქმეთა მინისტრმა, ლორან ფაბიუსმა გერმანელ და ქართველ კოლეგებთან ერთად გამართულ პრესკონფერენციაზე განაცხადა.
ამით ფაბიუსი ჟურნალისტის კითხვას გამოეხმაურა, რომელმაც სერგეი ლავროვის მიერ გუშინ გაკეთებულ მუქარისშემცველ განცხადებაზე იკითხა და როგორც ჟურნალისტმა აღნიშნა, ისეთი შთაბეჭდილება რჩება, თითქოს ყრუს ვესაუბრებით.
კითხვაზე, შეძლებს თუ არა დიპლომატია რუსეთი შეაჩეროს, ლორან ფაბიუსმა განაცხადა, რომ მათი არჩევანი რუსეთის ქმედებებზე არის სიმტკიცის გამოჩენა და დიალოგი.
როგორც ფაბიუსმა აღნიშნა, ევროკავშირმა დაგმო რუსეთის მიერ ყირიმის ანექსია, რაც საერთაშორისო სამართალს ეწინააღმდეგება. აქვე საფრანგეთის საგარეო საქმეთა მინისტრმა აღნიშნა, რომ დღის წესრიგში არ დგას ყირიმთან დაკავშირებით რუსეთის ქმედებების იურიდიულად გაფორმება.
როგორც ლორან ფაბიუსმა აღნიშნა, უკრაინასთან დაკავშირებით ევროკავშირმა გადაწყვიტა დაეწყო რუსეთის წინააღმდეგ სანქციები სამ დონეზე. მისი თქმით, სანქციების პირველი და მეორე ნაბიჯები გადადგმულია.
“თუ ახალი მოქმედება იქნება უკრაინის წინააღმდეგ, კიდევ შეგვიძლია სანქციების შემდეგ ეტაპზე გადავიდეთ”, – განაცხადა ლორან ფაბიუსმა.
მისივე თქმით, როდესაც ხდება ქვეყნის ტერიტორიული მთლიანობის დარღვევა, ის დაგმობილი უნდა იყოს. თუმცა, აქვე აღნიშნა, რომ სამხედრო დაპირისპირებაზე წასვლა არავის სურს და ყველა დიალოგის მომხრეა. როგორც საფრანგეთის საგარეო საქმეთა მინისტრმა აღნიშნა, დიალოგის საშუალება ყოველთვის უნდა იყოს.
24.04.14
Discussion about this post