არასამთავრობო ორგანიზაციები დღეს ქუთაისში, საქართველოს პარლამენტში ანტიდისკრიმინაციული კანონპროექტის განხილვაზე დასწრებას გეგმავენ.
როგორც ფონდ “ღია საზოგადოება – საქართველოს” აღმასრულებელმა დირექტორმა ქეთი ხუციშვილმა განაცხადა, დიდი იმედი აქვთ, რომ საკითხთან დაკავშირებით პარლამენტი მეორე მოსმენისთვის შენიშვნებს ნაწილობრივ მაინც გაითვალისწინებს. მისივე თქმით, კანონპროექტის დახვეწისა და კანონში ეფექტური მექანიზმების ჩადების დრო ჯერ კიდევ არის, რათა საქართველოში მართლაც იქნას დისკრიმინაციის ყველა ფორმა აღმოფხვრილი. ამასთან, ქეთი ხუციშვილმა აღნიშნა, რომ კანონპროექტთან დაკავშირებით იუსტიციის სამინისტროსთან ძალიან ღია, ინკლუზიური და კარგი თანამშრომლობა იყო.
“პროცედურების მიხედვით, იუსტიციის სამინისტრომ კანონპროექტი გადასცა მთავრობას, მთავრობიდან უკვე წარედგინა პარლამენტს. ამ მომენტში ზუსტად არ ვიცით როგორ და რატომ მოხდა ამ ცვლილებების შეტანა, თუმცა შეგვიძლია გარკვეული მოსაზრებები გვქონდეს”, – აღნიშნა ქეთი ხუციშვილმა.
არასამთავრობო ორგანიზაცია SIDA-ს აღმასრულებელი დირექტორის, ზვიად დევდარიანის განცხადებით, ხელისუფლების მთავარი ამოცანა უნდა იყოს, მოახერხოს საკუთარი მოქალაქეების კონსტიტუციით გარანტირებული უფლებების განხორციელება. მისივე განმარტებით, პერიოდულად ხდება ხაზგასმა, რომ ანტიდისკრიმინაციული კანონმდებლობის მიღება ჩვენი სახელმწიფოს საერთაშორისო ვალდებულებაა, რაც ნამდვილად ასეა, მაგრამ ამაზე ბევრად მნიშვნელოვანია აღნიშნული კანონმდებლობით მოხდეს იმ ადამიანების უფლებების დაცვა, რომელთა დისკრიმინაცია ხდებოდა, ხდება და პოტენციურად შეიძლება მოხდეს.
“ჩვენ, ორგანიზაციები, რომლებიც ანტიდისკრიმინაციულ კანონპროექტთან დაკავშირებით განცხადებას ვავრცელებთ, ხაზს ვუსვამთ, რომ არ დავუშვებთ, მოხდეს ამ პროცესის ფორმალიზება, ფორმალურად მივიღოთ კანონმდებლობა, რომლითაც ჩვენ გარკვეული ტიპის საერთაშორისო ვალდებულებებს შევასრულებთ. ჩვენ ხელი უნდა შევუწყოთ მივიღოთ ისეთი კანონი, რომელიც რეალურად მოახერხებს დისკრიმინაციის მსხვერპლების უფლებების დაცვას”, – აღნიშნა ზვიად დევდარიანმა.
ამასთან, არასამთავრობო ორგანიზაცია “იდენტობის” ხელმძღვანელის, ირაკლი ვაჭარაძის შეფასებით, მნიშვნელოვანია მოქმედი ანტიდისკრიმინაციული კანონის და არა მხოლოდ სიმბოლური სახელწოდების დოკუმენტის მიღება.
“თუ ხელისუფლება მიიჩნევს, რომ მხოლოდ ფორმალურად შეუძლია ასეთი კანონი მიიღოს და ამით საქმეს ეშველება – ეს იქნება თავის მოტყუება, რადგან ქვეყანაში პრობლემები არ მოგვარდება, ადამიანები გააგრძელებენ თავშესაფრის ძებნას და საქართველოს უვიზო მიმოსვლა გარანტირებული არ ექნება”, – აღნიშა ირაკლი ვაჭარაძემ.
“დისკრიმინაციის ყველა ფორმის აღმოფხვრის შესახებ” კანონპროექტის მეორე მოსმენა პარლამენტში დღეს არის დაგეგმილი.
29.04.14
