გიორგი მარგველაშვილი: “ეს იყო მკვეთრად გამოხატული მხარდაჭერა”

საქართველოს პრეზიდენტმა, გიორგი მარგველაშვილმა ესტონეთის რესპუბლიკაში სამუშაო ვიზიტი დაასრულა. პრეზიდენტის ადმინისტრაციის ინფორმაციით, ვიზიტის ფარგლებში გიორგი მარგველაშვილმა, ესტონეთის პრეზიდენტთან, ტოომას ჰენდრიკს ილვესთან ერთად, კიბერუსაფრთხოების საერთაშორისო კონფერენცია გახსნა, ხოლო შემდეგ მაღალი რანგის ორმხრივი შეხვედრები გამართა. მარგველაშვილმა ესტონეთში გამართული ვიზიტი ჟურნალისტებთან შეაფასა.

“შევხვდით ესტონეთის პრეზიდენტს, პრემიერ-მინისტრს, პარლამენტის თავმჯდომარესა და საგარეო საქმეთა მინისტრს. ეს იყო უაღრესად იმედის მომცემი შეხვედრები, განსაკუთრებით იმ დაძაბულ ვითარებაში, რომელიც ახლა არის. ჩვენ კიდევ ერთხელ ვიგრძენით ესტონეთის სრული მხარდაჭერა როგორც ჩვენი ნატო-ში ინტეგრაციის, ასევე ევროპასთან ასოცირებისა და ევროპის ოჯახში გაწევრების მიმართულებით. ეს იყო მკვეთრად გამოხატული მხარდაჭერა საქართველოსა და ჩვენ მიერ არჩეული სტრატეგიული კურსის მიმართ. მე კიდევ ერთხელ მსურს გავიმეორო ის, რაც ყველა შეხვედრაზე აღვნიშნე, ჩვენ ძალიან მადლიერები ვართ ესტონელი პარტნიორების მიერ გამოხატული მხარდაჭერისათვის”, – განაცხადა საქართველოს პრეზიდენტმა.

29.04.14