ანტიდისკრიმინაციული კანონმდებლობით არანაირი ამორალურის პროპაგანდა და წახალისება არ ხდება, – ამის შესახებ პარლამენტის ვიცე-სპიკერმა მანანა კობახიძემ განაცხადა.
როგორც კობახიძემ აღნიშნა, კანონპროექტში საუბარია იმაზე, რომ ჩაგვრა მიუღებელი და დაუშვებელია.
“რა თქმა უნდა, ჩვენ პატივს ვცემთ პატრიარქისა და საპატრიარქოს პოზიციას, კიდევ ერთხელ ვუდასტურებთ პატივისცემას და ამავე დროს საზოგადოებას მინდა კიდევ ერთხელ ვაუწყო, რომ რაიმე საფრთხეები ამ კანონის მიღებით არ იქნება. მითუმეტეს, რაღაც ამორალურის არანაირი პროპაგანდა ამ კანონში არ არის. არაფრის წახალისება არ ხდება”, – განაცხადა კობახიძემ.
საქართველოს პარლამენტის ბიუროს დღევანდელი გადაწყვეტილებით, ანტიდისკრიმინაციული კანონმდებლობის განხილვა ადამიანის უფლებათა დაცვის კომიტეტის დღის წესრიგში რჩება.
კანონპროექტის განხილვას არასამთავრობო სექტორის წარმომადგენლებიც დაესწრებიან, რომლებიც პროექტში გარკვეული ცვლილებების შეტანს ითხოვენ.
“დისკრიმინაციის ყველა ფორმის აღმოფხვრის შესახებ” კანონპროექტის პარლამენტში განხილვის შეჩერებას საქართველოს კათოლიკოს-პატრიარქი ითხოვს.
ამასთან, ანტიდისკრიმინაციული კანონმდებლობას სავარაუდოდ, ხვალინდელ პლენარულ სხდომაზე მეორე მოსმენით უყრიან კენჭს.
29.04.14
Discussion about this post