საქართველოს პრეზიდენტის, გიორგი მარგველაშვილის განცხადებით, სამმხრივ სამიტზე ისაუბრეს იმ თანამშრომლობაზე, რომელიც სამ ქვეყანას – საქართველოს, აზერბაიჯანს და თურქეთს შორის შედგა.
ამის შესახებ საქართველოს პრეზიდენტმა, გიორგი მარგველაშვილმა პრეზიდენტის სასახლეში აზერბაიჯანის და თურქეთის პრეზიდენტებთან შეხვედრის შემდეგ გამართულ ერთობლივ პრესკონფერენციაზე განაცხადა.
“მინდა კიდევ ერთხელ ხაზგასმით მივესალმო ჩემს მეგობრებს, აზერბაიჯანის და თურქეთის პრეზიდენტებს, მათ თანმხლებ დელეგაციებს, ყველას ვინც დღევანდელ სამიტში მონაწილეობდა. ეს სამიტი უაღრესად მნიშვნელოვანი იქნება, არა მხოლოდ ჩვენი ქვეყნებისთვის, არამედ სხვა მრავალი ქვეყნისთვის ჩვენს რეგიონს გარეთ, მრავალი მილიონი ადამიანისთვის, რომელიც ამ სამიტის სიკეთეებით ისარგებლებს.
მინდა მადლობა ვუთხრა თურქეთის პრეზიდენტს იმისთვის, რომ ასეთი სამიტის საფუძვლის ჩაყრის იდეა წარმოიქმნა. მადლობა ილჰამ ალიევს, რომელმაც თავის მხარდაჭერას და სამიტის მომავალ რეგულარობას გაუსვა ხაზი. სამიტზე ჩვენ ვსაუბრობდით იმ თანამშრომლობაზე, რომელიც შედგა ჩვენ სამ ქვეყანას შორის. ეს ისტორიული თანამშრომლობაა, რომელიც გავლენას ახდენს ჩვენი ქვეყნების ეკონომიკაზე, მოსახლეობის კეთილდღეობაზე, რეგიონის ეკონომიკაზე, სტაბილურობაზე, გავლენას ახდენს ათობით მილიონ ადამიანზე როგორც აზიაში, ასევე ევროპაში, რომელიც ჩვენი თანამშრომლობის, კეთილმეზობლობის გათვალისწინების შედეგად სარგებლობს ამ თანამშრომლობის შედეგებით”, – განაცხადა საქართველოს პრეზიდენტმა.
მისი თქმით, სამიტზე ისაუბრეს იმ უმნიშვნელოვანეს პროექტებზე, რომელიც დაწყებულია და აერთებს კასპიის, შავი და ხმელთაშუა ზღვის აუზებს ერთმანეთთან. როგორც მარგველაშვილმა აღნიშნა, ამ პროექტების გარღმავება, შორს მიმართვა, კიდევ უფრო მეტი ქვეყნის ჩართვა რეალურად უზრუნველყოფს სტაბულურობას ჩვენს რეგიონში.
“ჩვენ ხაზი გავუსვით, რომ რეგიონი უფრო სტაბილურია, როდესაც მეტი ქვეყანა არის ამით დაინტესებული. ასეთი მუშაობისკენ იყო მიმართული სამივე ქვეყნის დელეგაცია”, -აღნიშნა მარგველაშვილმა.
06.05.14
