საქართველოს შეუძლია გახდეს რეგიონში ფრანგული ბიზნესის დასაყრდენი ადგილი, – ამის შესახებ ეკონომიკისა და მდგრადი განვითარების მინისტრმა , გიორგი კვირიკაშვილმა “ექსპო ჯორჯიაში” საქართველო-საფრანგეთის ბიზნესფორუმზე სიტყვით გამოსვლისას განაცხადა.
კვირიკაშვილმა აღნიშნა, რომ ძალიან მნიშვნელოვანია ფრანგ პარტნიორებს გავაცნოთ, რომ ჩვენი მთავრობის უმნიშვნელოვანეს პრიორიტეტს წარმოადგენს საუკეთესო საინვესტიციო ბიზნესგარემოს შექმნა.
“დღეს საქართველოს აქვს ძალიან მარტივი ადმინისტრაციული პროცედურა ბიზნესის წარმოებისთვის, ასევე დაბალია გადასახადები. ჩვენ ძალიან მნიშვნელოვან პროგრესს მივაღწიეთ საკუთრების უფლების ხელშეუხებლობის უზრუნველყოფაში. ასევე ბაზარზე თავისუფალი კონკურენციის დამკვიდრებაში. საქართველო როგორც აღმოსავლეთ ევროპის ქვეყანა, ისწრაფვის ევროინტეგრაციის მიმართულებით და ახორციელებს სერიოზულ საკანონმდებლო და ინსტიტუციურ რეფორმებს ამ გზაზე”, – განაცხადა გიორგი კვირიკაშვილმა.
მისივე თქმით, ასოცირების ხელშეკრულების შემადგენელი ღრმა და ყოვლისმომცველი თავისუფალი სავაჭრო სივრცის შესახებ შეთანხმება, რომელიც ივნისში გაფორმდება, შექმნის საქართველოში ბიზნესგარემოს და დანერგავს საუკეთესო პრაქტიკას, რაც ევროპულ ბიზნესს მათთვის კარგად ნაცნობ თამაშის წესებს შესთავაზებს.
“ღრმა და ყოვლისმომცველი თავისუფალი სავაჭრო სივრცე ფრანგულ ბიზნესს შესაძლებლობას მისცემს დააფუძნონ ფილიალები და წარმოება საქართველოში, ასევე ქართულ ბიზნესს მისცემს საშუალებას, თავიანთი პროდუქცია შეიტანონ ევროკავშირის ბაზარზე. საქართველოს შეუძლია გახდეს რეგიონში ფრანგული ბიზნესის დასაყრდენი ადგილი, ფრანგული საქონლისა და მომსახურების კარიბჭე სამხრეთ კავკასიასა და ცენტრალურ აზიაში”, – განაცხადა კვირიკაშვილმა და დასძინა, რომ ასოცირების შეთანხმება საქართველოს გახდის ძალიან მნიშვნელოვან მიმზიდველ საინვესტიციო ქვეყნად.
13.05.14
