ერთადერთმა კაცმა იცის, თუ ვინ უსმენს მართლა, ეს გახლავთ ტელეკომპანია “რუსთავი 2”-ის დღევანდელი ხელმძღვანელი და ცოცხალი თავით არ ამბობს , – ამის შესახებ საპარლამენტო უმრავლესობის წევრმა ნუკრი ქანთარიამ პლენარულ სხდომაზე სიტყვით გამოსვლისას, “რუსთავი 2”-ის მიერ გავრცელებული ფარული ჩანაწერების კომენტირებისას განაცხადა.
“ერთადერთმა კაცმა იცის, თუ ვინ უსმენს მართლა, ეს გახლავთ ტელეკომპანია “რუსთავი 2″-ის დღევანდელი ხელმძღვანელი და ცოცხალი თავით არ ამბობს. ის რაღაც ჟურნალისტურ ქარტიას ეფარება და არ ამბობს, ვინ მიუტანა ეს ჩანაწერები. ჩემთვის ცოტა გაურკვეველია ეს ფაქტი, რომ შენ გქონდეს აკრძალული ნივთი, ეს ნივთი ვიღაცამ მოიპარა და მოგიტანა, შენ ხმარობ მას და არ ასახელებ, თუ ვინ მოგცა. მაშინ ან შენ თავზე აიღე ეს ყველაფერი ან დაასახელე წყარო და მაშინ მარტივია ყველაფრის გაგება და ამდენი გამოძიება არ დაგვჭირდება”, – განაცხადა ქანთარიამ.
მისივე თქმით, წინააღმდეგ შემთხვევაში ნიკა გვარამია თავად ხდება ავტორი და რეალიზატორი აღნიშნული ჩანაწერებისა.
“რაც შეეხება იმ სიტყვებს – კუპრი, ჯოჯოხეთი და ა.შ., მე მას მოვუწოდებ, ხელისუფლების ჰუმანურობას სისუსტედ ნუ ჩათვლის. ჩვენ არავის მოვუწყობთ ჯოჯოხეთს, მაგრამ პირდაპირ ვეუბნები ბატონ გვარამიას, რომ იმ პოზიციით, რაც მან დაიჭირა, ცეცხლს ეთამაშება და თვითონვე დაინახავს ჯოჯოხეთს, ამიტომ მიიღოს ყველაზე ლოგიკური გადაწყვეტილება და დაასახელოს, საიდან გამოჟონა ამ ინფორმაციამ”, – განაცხადა ქანთარიამ.