”თბილისი თაიმსის” მორიგი ბლიც-გამოკითხვა ავტო-სკოლებს ეხება. მართვის მოწმობის აღების მსურველთა რიცხვის პირდაპირპროპორციულად ავტო-სკოლების რაოდენობაც იზრდება. ჩვენ შევეცადეთ გაგვერკვია რამდენად კონკურენტულია ბაზარი ამ კუთით, რა ფასად სთავაზობენ მომსახურებას ავტო-სკოლები მსურველებს და იღებენ თუ არა სათანადო ცოდნას მართვის მოწმობის აღების მსურველები სასწავლო კურსის გავლისას.
გამოიკითხა ბაზარზე არსებული ხუთი ავტო-სკოლა, რომელთა წარმომადგენლები ადასტურებენ, რომ კონკურენცია მაღალია, რომლის შედეგადაც კურსებზე ფასები მცირდებაა, ხუთივე სკოლის წარმომადგენელი თანხმდება, რომ კურსის გავლის შემდეგ მოსწავლეები არ არიან მზად ქალაქის ქუჩებში მართონ ავტომანქანა.
გთავაზობთ ბლიც-გამოკითხვის შედეგებს:
სკოლა დრაივერი : ”თეორიული მეცადინეობის სრული კურსის ღირებულებაა 80 ლარი, პრაქტიკული მეცადინეობის თითო გაკვეთილის კი – 20 ლარი, პერიოდულად ფასდაკლების სხვადასხვა საიტზე ვანთავსებთ ჩვენს აქციებს და მსურველებს შესაძლებლობა აქვთ უფრო დაბალ ფასად მიიღონ ჩვენი მომსახურეობა. თითოეულ კლინეტს სხვადასხვა დრო სჭირდება, იმისათვის, რომ მზად იყოს გამოცდაზე გასასვლელად, ყველაზე მინიმალური დრო არის ორი კვირა, ხოლო მაქსიმალური- 1 თვე. კურსებზე მოთხოვნა საკმაოდ მაღალია, ძირითადად 19-დან 30 წლამდე ასაკობრივი კატეგორია მოგვმართავს ხოლმე, რომელთა შორის ქალბატონები ჭარბობენ. მართვის მოწმობის აღება არ ნიშნავს იმას, რომ მოსწავლე მზადაა ქალაქში მართოს ავტომანქანა, ამიტომ მას აუცილებლად სჭირდება დამატებითი გაკვეთილები ქალაქში მართვისთვის, ქალაქში სიარული სხვა აუნარ-ჩვევებს მოითხოვს, რაც საგამოცდო პროგრამაში არ არის გათვალისწინებული. კონკურენცია საკმაოდ მაღალია, სხვა სკოლების კადრებზე ინფორმაცია არ მაქვს, მაგრამ დანამდვილებით შემიძლია ვთქვა, რომ ჩვენს სკოლაში პროფესიონალები ასწავლიან. ჩვენს სკოლაში კურსის გავლის შემდგომ საშუალოდ 90%-ი აბარებს თეორიულ კურსს პირველივე ცდაზე, რაც შეეხება პრაქტიკას, რთულია პირველივე ცდაზე ჩაბარება, მეორე ცდაზე კი უმეტესობა წარმატებით აბარებს. ”
ლიდერი : ”ჩვენ რამდენიმე სახის პაკეტს ვთავაზობთ მომხმარებელს, ფასდაკლების საიტზე მსურველებს შეუძლიათ ფასდაკლებით შეიძინონ ჩვენი მომსახურება, ფასდაკლებით სრული თეორიული კურსის გავლა შესაძლებელია 35 ლარად, სრული კურსი თეორიის ხუთ პრაქტიკასთან ერთად ჯდება 140 ლარი და გვაქვს 300 ლარიანი გარანტირებული პაკეტი, ანუ სკოლა იღებს სრულ პასუხისმგებლობას, იმაზე, რომ სანამ მოსწავლე მართვის მოწმობას არ აიღებს სკოლა უზრუნველყოფს მის მეცადინეობას. თითოეულ მოსწავლეს ინდივდუალურად კომპიუტერთან უტარდება თეორიული გაკვეთილები, თითოეული თემის ახსნა მიმდინარეობს მასწავლებლების მიერ. მოსწავლე, რომელიც პასუხისმგებლობით უდგება საქმეს, არ აქვს გაცდენები და ესწრება ყოველდღე მეცადინეობებს საშუალოდ სამი კვირა სჭირდება კურსის გასავლელად, თუმცა გვქონია შემთხვევა, როცა ერთ კვირაშიც ყოფილა მზად მოსწავლე გამოცდაზე გასასვლელად. კურსებზე მოთხოვნა მაღალია, ჩვენს სკოლას აქვს უპირატესობა გასცეს ავტოსკოლის მოწმობა, რაც ხშირი არ არის, ანუ 17 წლის მოზარდებს ვაძლევთ ამ მოწმობას, რის საფუძველზეც მათ აქვთ გამოცდაზე გასვლის უფლება. არასრულწლოვანებთან ერთად ჩვენს კლიენტებს შორის არიან ზრდასრული ადამიანებიც, მაგრამ გვყავს 50 წელს გადაცილებული მოსწავლეებიც, რომლებიც, მინდა თამამად ვთქვა, რომ ძალიან ბევრ ახალგაზრდას ჯობია მუშაობისა და ათვისების კუთხით. ბოლო პერიოდში, რაც ამოქმედდა კანონი,რის მიხედვითაც უკვე შესაძლებელია გამოცდის ჩაბარება, როგორც ავტომატიკაზე, ასევე მექანიკაზე, ქალბატონები უფრო ხშირად გვსტუმრობენ. ის პრაქტიკული გაკვეთილები, რასაც მოსწავლე ნებისმიერ ავტოსკოლაში გადის, იმ ექვსი ელემენტის შესწავლით, რაც გამოცდაზე ბარდება, არ არის საკმარისი იმისთვის, რომ ადამიანმა ქალაქის ქუჩებში დამოუკიდებლად მოძრაობა შეძლოს, თუ, რა თქმა უნდა, გამოცდამდე არ ქონია მას ქალაქში მართვის პრაქტიკა. ხშირ შემთხვევაში ჩვენი მოსწავლეები მართვის მოწობის აღების შემდეგ იმატებენ პრაქტიკულ კურსებს, რათა ქალაქში მართვის გამოცდილება მიიღონ. გამომდინარე იქიადან, რომ ძალიან ბევრი ავტო-სკოლა გაიხსნა კონკურენცია ძალიან მაღალია, მაგრამ ვერ ვიტყვი, რომ ყველგან პროფესინალი პედაგოგები მუშაობენ. მე სხვა სკოლაში ვმუშაობდი მასწავლებლად და ჩემი წამოსვლის შემდეგ მასწავლებლად აიყვანეს ჩემი მოსწავლე, რომელსაც მრთვის მოწმობაც კი არ ქონდა, ამიტომ მინდა მომსახურების სააგენტოს მოწიწებით ვთხოვო, რომ შემოწმდეს ავტო-სკოლები და იქ მომუშავე მასწავლებლები. თამამად შემიძლია გითხრათ, რომ პრაქტიკულად შეუძლებელია თეორიაში ჩვენი მომზადებული მოსწავლე ჩაიჭრას, ჩვენ იქამდე არ ვაძლევთ მოსწავლეს გამოცდაზე გასვლის უფლებას, სანამ არ დავრწმუნდებით, რომ შიდა გამოცდებში ის შეცდომას თითქმის არ უშვებს. რაც შეეხება პრაქტიკას, ჩვენი მოსწავლეები ხშირ შემთხვევაში პირველივე ცდაზე აბარებენ გამოცდას ან მაქსიმუმ მეორეზე.”
ალპინა : ”ჩვენთან სამი პრაქტიკული კურსის ღირებულებაა 29 ლარი. თეორიული კურსის შესწავლა კი ხდებ აინდივიდუალურად, კომპიუტერთან. ინდივიდუალურად ყველას სხვადასხვა დრო სჭირდება გამოცდაზე გასასვლელად, თუმცა სასურველია ექვსი გაკვეთილის გავლა. ძირითადად სკოლის მოსწავლეები ითხოვენ მართვის შესწავლას, რომელთა შორის გოგონები ჭარბობენ. ჩვენ მსურველებს ვასწავლით იმ საკითხებს, რაც გამოცდაზე ბარდება და საჭიროა მართვის მოწმობის ასაღებად, რის შემდეგაც ხშირად იმატებენ კურსებს ქალაქში მოძრაობის პრაქტიკის მისაღებად, მაგრამ უმრავლესობისთვის მთავარია მართვის მოწმობა ქონდეს, ზოგს სამსახურში თხოვენ, ზოგს კი მოდისთვის სჭირდება. ბაზარზე კონკურენცია ძალიან მაღალია, ამიტომაც საწვავის ფასის ზრდის მიუხედავად ფასის დაკლება მოგვიწია, ძალიან ბევრი ავტო-სკოლაა გახსნილი, რომელთაგან ზოგიერთს მართვის შესასწავლად გამოუსადეგარი მანქანა ყავს, არიან მასწავლებლები, რომელთაც გადმოცემის უნარიც არა აქვს. ხშირად ყოფილა შემთხვევა, რომ ჩემი მოსწავლე ჩაჭრილა პრაქტიკულ ნაწილში პირველ ცდაზე, თუმცა შემიძლია ვთქვა, რომ ჩვენი მოსწავლეების 70%-ი პირველივე ჯერზე აბარებს გამცოდას. ”
პეკინის 27 : ”თეორიის სრული კურსის ღირებულებაა 39 ლარი, პრაქტიკული მეცადინეობის სრული კურსის ანუ რვა გაკვეთილის ღირებუკება კი 130 ლარს შეადგენს. თითოეული მოსწავლე ზის კომპიუტერთან და ინდივიდუალურად უხსნის მასწავლებელი საკითხებს. მოსწავლე საშუალოდ ორ კვირაში უკვე მზად რის გავიდეს გამოცდებზე. მოთხოვნა კურსებზე მაღალია, ძირითადად 18-დან 45 წლამდე ასაკობრივი კატეგორია ითხოვს მეცადინეობას, რომელთა შორისაც ქალები ჭარბობენ. მართვის მოწმობის აღების შემდეგ, მოსწავლემ აუცილებლად უნდა გაიაროს მართვის პრაქტიკული გაკვეთილები ქალაქში, რათა დამოუკიდებლად მართვა შეძლოს. რაც უნდა გასაკვირი იყოს, კონკურენტებით არ ვინტერესდები, რადგანაც ჩვენი სკოლა ძალიან მოთხოვნადია. ერთი წელია უკვე რაც ჩვენი სკოლა ფუნქციონირებს და გამოცდაზე ჩაჭრის ძალიან ცოტა ფაქტი ფიქსირდება.”
ადრენალინი : ”ჩვენთან თეორიული და პრაქტიკული მეცადინეობების ერთი კურსის ღირებულება მთლიანობაში შეადგენს 170 ლარს. მოსწავლეებს უტარდებათ ინდივიდუალური მეცადინეობები თორიაში და შემდეგ პრაქტიკა სპეციალურ მოედანზე. საშუალოდ 2-3 კვირა სჭირდებათ მოსწავლეებს გამოცდაზე გასასვლელად. მოთხოვნა საკმაოდ მაღალია, ძირითადად 20-დან 35 წლამდე ასაკობრივი კატეგორია ითხოვს კურსს, რომელთა შორის ქალბატონები ჭარბობენ. მართვის მოწმობის აღება არ ნიშნავს, იმას რომ მოსწავლე უკვე მზადაა ქალაქის ქუჩებში მართოს ავტომობილი, მას აუცილებლად დასჭირდება დამატებითი კურსები. კონკურენცია ბაზარზე საკმაოდ მაღალია, რის შედეგადაც კურსის ღირებულება შემცირდა. ჩვენს სკოლაში გამოცდილი მასწავლებლები ასწავლიან, ამიტომ მოსწავლეების 95%-ი გამოცდილს თეორიულ ნაწილს პირველივე ჯერზე აბარებს, პრაქტიკულ ნაწილს კი- 60-70 %-ი.”
30.05.14
ნინა პირტახია
