ირაკლი ღარიბაშვილი: “მე ვიცი, რომ თქვენ ყველას გაქვთ თქვენი მინისტრის იმედი”

საქართველოს პრემიერ-მინისტრის, ირაკლი ღარიბაშვილის განცხადებით, დღევანდელი დღე მისთვის განსაკუთრებულად ემოციური დღეა.

როგორც ირაკლი ღარიბაშვილმა ბათუმში, პოლიციის დღისადმი მიძღვნილ ღონისძიებზე სიტყვით გამოსვლისას განაცხადა, მისთვის ძალიან საპასუხისმგებლო და ამავე დროს საპატიო იყო შინაგან საქმეთა მინისტრობა.

“ამ სისტემაში გატარებულმა თითოეულმა დღემ უზარმაზარი გამოცდილება და ცოდნა მომცა, ასევე მომცა განსახვავებული ენერგია. აქ სულ სხვა სულისკვეთებაა. აქ განვიცადე ის ბედნიერება, რასაც ჰქვია შენი სამშობლოს სიყვარული, შენი სამშობლოს სამსახური. სწორედ აქ შეგიძლია ბოლომდე გამოხატო შენი ერთგულება და სამშობლოს სიყვარული. აქ შეგიძლია დაამტკიცო, თუ როგორ ერთგულად ემსახურები შენს ქვეყანას.
მე ვარ მადლიერი თითოეული თქვენგანის, იმიტომ, რომ თქვენი წარმატებული საქმიანობა ყოველთვის განაპირობებს მინისტრის წარმატებულ საქმიანობას”, – განაცხადა პრემიერ-მინისტრმა.

ირაკლი ღარიბაშვილმა განსაკუთრებული მადლიერებით აღნიშნა შს მინისტრის, ალექსანდრე ჭიკაიძის საქმიანობა.

“ლექსო არის ნამდვილი პოლიციელი. ის არის ღირსეული ადამიანი, რომელიც ღირსეული პოლიციელის ოჯახში აღიზარდა. ის არის ადამიანი, რომელმაც იცის სამშობლოს სიყვარული და საქმის ერთგულება. ეს არის ადამიანი, რომელიც არასოდეს გიღალატებს. მე ვიცი, რომ თქვენ ყველას გაქვთ თქვენი მინისტრის იმედი”, – მიმართა ღარიბაშვილმა პოლიციელებს.

30.05.14