გვაქვს ამბიცია, რომ ადგილობრივი თვითმმართველობის არჩევნები კიდევ უფრო უკეთესი იყოს, ვიდრე საპრეზიდენტო არჩევნები , – ამის შესახებ საქართველოს პრემიერ-მინისტრმა “ექსპო ჯორჯიაში” მიმდინარე პრესკონფერენციაზე განაცხადა. მისი თქმით, საარჩევნო გარემო გაუმჯობესდა.
“აბსოლუტურად გავაუმჯობესეთ საარჩევნო გარემო. იგივე საპრეზიდენტო არჩევნების წინასაარჩვენო გარემო იყო აბსოლუტურად ღია, გამჭვირვალე, რომელმაც დაიმსახურა ძალიან მაღალი შეფასებები საერთაშორისო საზოგადოების მხრიდან. ჩვენ გვაქვს ამბიცია, რომ იგივე პირობებში და კიდევ უფრო უკეთეს პირობებში ჩავატაროთ ადგილობრივი არჩევნები”, – განაცხადა ღარიბაშვილმა.
პრემიერმა ისაუბრა ადგილობრივი თვითმმართველობის რეფორმაზეც. მისი თქმით, ამ მიმართულებით რევოლუციური კოდექსი შეიქმნა.
“მე დღეს, მესმის ბევრი საუბარი, რომ მთავრობამ არაფერი შეცვალა და დატოვა იგივე, რაც შეიმუშავა “ნაციონალურმა მოძრაობამ”. მინდა შევახსენო საზოგადოებას, რომ პირველად თანამედროვე საქართველოს ისტორიაში 12 ქალაქის მერი და 60-მდე გამგებელი იქნება პირდაპირი წესით არჩეული საქართველოს მოსახლეობის მიერ. ეს არის ძალიან წინგადადგმული ნაბიჯი, რომელიც ევროკავშირის ბევრმა ქვეყანამ ვერ შეძლო. ბევრ ქვეყანაში ჯერ კიდევ არ ირჩევენ პირდაპირი წესით მერებს და გამგებლებს”, – აღნიშნა პრემიერმა.
04.06.14