ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი უკრაინაში, კიევში სამუშაო ვიზიტის ფარგლებში საგარეო საქმეთა მინისტრ ანდრეი დეშიცას შეხვდა.
შეხვედრაზე სახელმწიფო მინისტრმა საქართველოს ხელისუფლების სახელით უკრაინულ მხარეს წარმატებით ჩატარებული საპრეზიდენტო არჩევნები მიულოცა. ალექსი პეტრიაშვილმა, ასევე, ხაზი გაუსვა საქართველოს ხელისუფლების მხრიდან უკრაინის ტერიტორიული მთლიანობისა და სუვერენიტეტის მხარდაჭერას.
შეხვედრაზე უკრაინულმა მხარემ განსაკუთრებული ინტერესი გამოხატა ევროინტეგრაციის საკითხთა კოორდინაციისა და რეფორმების განხორციელების საკითხებში საქართველოს გამოცდილების მიმართ. სახელმწიფო მინისტრმა მასპინძლებს მხარდაჭერა აღუთქვა და დაადასტურა საქართველოს შესაბამისი უწყებების მზაობა უკრაინელი კოლეგებისათვის გამოცდილების გაზიარების თობაზე.
ორმხრივ შეხვედრაზე აღინიშნა აღმოსავლეთ პარტნიორობის ფარგლებში თანამშრომლობის განვითარების აუცილებლობა და პოზიციების კოორდინირების მნიშვნელობა. მხარეებმა საქართველოში, უკრაინასა და აღმოსავლეთ ევროპის რეგიონში უსაფრთხოებისა და სტაბილურობის მხრივ არსებული გამოწვევები და მათი გადაჭრის გზები განიხილეს. ხაზი გაესვა საერთაშორისო ორგანიზაციების ფარგლებში საქართველოსა და უკრაინას შორის თანამშრომლობის მნიშვნელობას.
სახელმწიფო მინისტრმა, ასევე, მონაწილეობა მიიღო კიევში 4-5 ივნისს გამართული საერთაშორისო კონფერენციის მუშაობაშიც. კონფერენციაზე „DCFTA და არა მარტო – როგორ შეიძლება ევროკავშირმა ხელი შეუწყოს აღმოსავლეთ პარტნიორობის ქვეყნების განვითრებასა და კეთილდღეობას“ (“DCFTAs and Beyond – How the EC can contribute to development and welfare in Eastern partnership countries”), რომელიც სტოქჰოლმის ინსტიტუტის გარდამავალი ეკონომიკებისა და კიევის ეკონომიკის სკოლის ორგანიზებით გაიმართა, ევროკავშირთან ღრმა და ყოვლისმომცველი სავაჭრო სივრცის შესახებ შეთანხმების მნიშვნელობასა და „აღმოსავლეთ პარტნიორობის“ მონაწილე ქვეყნებისთვის შეთანხმების ძალაში შესვლის შემდეგ სავარაუდო ეკონომიკურ სარგებელზე იმსჯელეს.
ალექსი პეტრიაშვილს უკრაინაში სამუშაო ვიზიტის ფარგლებში დაგეგმილი აქვს შეხვედრები სახელმწიფო მინისტრთან ევროპულ საკითხებში ოსტაპ სემერიაკთან და პარლამენტის ვიცე-სპიკერთან რუსლან კოშულინსკისთან.
06.06.14
