ჩვენი შეიარაღებული ძალებისთვის, პრაქტიკულად, შეუსრულებელი მისია არ არსებობს, – ამის შესახებ თავდაცვის მინისტრმა ირაკლი ალასანიამ გუშინ, ჟურნალისტებს ქართველი სამხედროების ცენტრალური აფრიკის რესპუბლიკაში გამგზავრების ცერემონიის დასრულების შემდეგ განუცხადა.
როგორც მინისტრმა აღნიშნა, ქართველი სამხედროები მისიის შესასრულებლად მზად არიან. “ევროკავშირის ეგიდით საერთაშორისო მისიისთვის ჩვენი ბიჭები უკვე რამდენიმე თვეა ემზადებიან. მათ გაიარეს ყველა სერტიფიკაცია, ყველანაირი მომზადება. ჩვენი შეიარაღებული ძალებისთვის, პრაქტიკულად, შეუსრულებელი მისია არ არსებობს. აქ არის ძალიან გამოცდილი ხალხი, გამოცდილი ოფიცრები, მათ 4-5 ვადა აქვთ მოხდილი საერთაშორისო მისიებში. არიან სრულიად თავსებადი, როგორც ნატოს, ასევე ევროკავშირის წევრი ქვეყნების შეიარაღებულ ძალებთან, მათ შორის, საფრანგეთთან, რომელიც იქნება წამყვანი ძალა და მათი შენაერთი იქნება ყველაზე დიდი. ჩვენ წინასწარი სადაზვერვო მოსამზადებელი ჯგუფი გვყავდა გაშვებული, რომელმაც ჩამოიტანა ინფორმაცია, იმ გარემოზე, სადაც ჩვენს სამხედროებს მოუწევთ მისიის შესრულება. ასე რომ, აბსოლუტურად მზად არიან ჩვენი ბიჭები მისიის შესასრულებლად და მშვიდობის დასაბრუნებლად”, – განაცხადა თავდაცვის მინისტრმა.
სამშვიდობო ოპერაციაში მონაწილეობას ბათუმის ცალკეული მსუბუქი ქვეითი ბატალიონის ასეულის სამხედრო მოსამსახურეები მიიღებენ. ისინი მისიას ცენტრალური აფრიკის დედაქალაქ ბანგიში შეასრულებენ. გაცილების ცერემონიალი გუშინ ვაზიანის მე-4 მექანიზებული ბრიგადის სამწყობრო მოედანზე გაიმართა.
07.06.14