საქართველოსა და სომხეთის მთავრობებს შორის ორ დოკუმენტს მოეწერა ხელი. ტურიზმის სფეროში თანამშრომლობის შესახებ და საიდუმლო ინფორმაციის გაცვლისა და ორმხრივად დაცვის შესახებ შეთანხმებებს ხელი საგარეო საქმეთა მინისტრებმა, მაია ფანჯიკიძემ და ედვარდ ნალბანდიანმა მოაწერეს.
ხელშეკრულების გაფორმების პროცესს ესწრებოდნენ საქართველოს პრემიერ-მინისტრი ირაკლი ღარიბაშვილი, სომხეთის პრეზიდენტი სერჟ სარგსიანი და ორი ქვეყნის მთავრობის წარმომადგენლები. აღნიშნული დოკუმენტების მნიშვნელობაზე კომენტარი საქართველოს საგარეო საქმეთა მინისტრმა მაია ფანჯიკიძემ გააკეთა.
“გასულ წელს 1 300 000 სომეხი ტურისტი იმყოფებოდა საქართველოში. ტურიზმი არის ეკონომიკის დარგი, რომელსაც განვითარების ძალიან დიდი პოტენციალი გააჩნია და სწორედ ამ სფეროს დაარეგულირებს ხელშეკრულება, რომელსაც ხელი მოვაწერეთ. რაც შეეხება საიდუმლო ინფორმაციის გაცვლას, ეს არის მეგობრულ ქვეყნებს შორის გაფორმებული ხელშეკრულება, რომელიც ამ დონეზე ურთიერთობებს ითვალისწინებს”, – განუცხადა ჟურნალისტებს მაია ფანჯიკიძემ.
ხელშეკრულებების გაფორმების წინ ირაკლი ღარიბაშვილი და სერჟ სარგსიანი მინისტრებთან ერთად სამუშაო საუზმის ფარგლებში შეხვდნენ ერთმანეთს. შეხვედრა სასტუმრო “თბილისი მარიოტში” გაიმართა.
19.06.14