არჩევნების მეორე ტურის თარიღი შემაჯამებელი ოქმის მიღების და ყველა სასამართლო დავის დასრულების შემდეგ გამოცხადდება, – ამის შესახებ ცესკო-ს თავმჯდომარე თამარ ჟვანიამ დღეს გამართულ ბრიფინგზე განაცხადა. თამარ ჟვანია გიგი უგულავას განცხადებას გამოეხმაურა და განაცხადა, რომ უგულავას განცხადება საკანონმდებლო ჩარჩოებს სცილდება.
“ცესკო ეხმაურება “ნაციონალური მოძრაობის”, კერძოდ, გიგი უგულავას განცხადებას და აღნიშნავს, რომ მის მიერ გაკეთებული შეფასებები და მოთხოვნა საკანონმდებლო ჩარჩოებს სცილდება. აქედან გამომდინარე, მივმართავ ყველა საარჩევნო სუბიექტს, მეტი კომპეტენცია და პასუხისმგებლობა გამოიჩინონ საარჩევნო საკითხებზე მსჯელობისას და არ შეაფასონ საარჩევნო ადმინისტრაციის საქმიანობა ვიწრო პოლიტიკური მიზნებიდან გამომდინარე. თვითმმართველობის არჩევნების მეორე ტურის დანიშვნა არ წარმოადგენს ცესკო-ს თავმჯდომარის კომპტენციას, და არ არის დამოკიდებული კომისიის მოქნილობაზე. ცალსახად განვმარტავთ, რომ არჩევნების მეორე ტურის თარიღი გამოცხადდება კანონმდებლობის შესაბამისად, შემაჯამებელი ოქმის მიღების და ყველა სასამართლო დავის დასრულების შემდეგ. ცესკო არის დამოუკიდებელი ორგანო, მოქმედებს კანონმდებლობის ფარგლებში და შესაბამისად, ვერც ერთი პოლიტიკური ძალა ან მათი განცხადებები ვერ იქონიებს გავლენას”, – განაცხადა ჟვანიამ.
“ერთიანი ნაციონალური მოძრაობა” ცენტრალურ საარჩევნო კომისიას ადგილობრივი თვითმმართველობის არჩევნების მეორე ტურის თარიღის გამოცხადებისკენ მოუწოდებს. როგორც დღეს გამართულ ბრიფინგზე გიგი უგულავამ განაცხადა, “ერთიან ნაციონალურ მოძრაობას” აქვს სრულიად ლოგიკური და ლეგიტიმური მოთხოვნა ცენტრალური საარჩევნო კომისიის მიმართ, უმოკლეს ვადებში დაასახელოს არჩევნების მეორე ტურის თარიღი.
“ჩვენი ინფორმაციით, მთავრობამ მოახდინა ზეწოლა თამარ ჟვანიაზე. მთავრობის მოთხოვნა იყო 12 ივლისი, რაც აბსოლუტურად ეწინააღმდეგება იმ წესებს და პროცედურებს, რომლებიც არსებობს. მოგეხსენებათ, ძალიან ბევრ სუბიექტს შედეგები გასაჩივრებული აქვს სასამართლოში და მიმდინარეობს ხელახალი გადათვლები; შესაბამისად, შეუძლებელია, 19 ივლისამდე ადრე ცენტრალურმა საარჩევნო კომისიამ დანიშნოს არჩევნების მეორე ტური”, – აღნიშნა უგულავამ.
23.06.14