საქართველოს პრემიერ-მინისტრი ირაკლი ღარიბაშვილი ისრაელის სოფლის მეურნეობის მინისტრ იაირ შამირს შეხვდა.
პრემიერის პრესსამსახურის ინფორმაციით, მხარეებმა საქართველოს მთავრობასა და ისრაელის სახელმწიფოს მთავრობას შორის სოფლის მეურნეობის დარგში თანამშრომლობის შესახებ” შეთანხმება განიხილეს.
როგორც მხარეებმა აღნიშნეს, შეთანხმება, რომელიც დღეს გაფორმდა, ხელს შეუწყობს ორ ქვეყანას შორის აგრარულ სფეროში თანამშრომლობას.
შეხვედრაზე გამოითქვა იმედი, რომ სასოფლო-სამეურნეო პროდუქტების, ხორბლის წარმოების, ბოსტნეულისა და ხილის მოყვანის, მცენარეთა დაცვის, სურსათის უვნებლობის, კარანტინის და მავნებლებთან ბრძოლის, მესაქონლეობის, მეფრინველეობის, ვეტერინარული ზედამხედველობის, ცხოველთა ჯანმრთელობის და სასოფლო-სამეურნეო კოოპერატივებისა და მევენახეობა-მეღვინეობის სფეროებში საქართველო-ისრაელის თანამშრომლობა კიდევ უფრო გაღრმავდება.
საქართველოს პრემიერ-მინისტრმა და ისრაელის სოფლის მეურნეობის მინისტრმა აგროსასურსათო სექტორში საქართველოში ერთობლივი საინვესტიციო პროექტების განხორციელების შესაძლებლობებიც განიხილეს.
შეხვედრას ისრაელის დელეგაცია და საქართველოს სოფლის მეურნეობის მინისტრი შალვა ფიფია დაესწრნენ.
23.06.14
