ასოცირების ხელშეკრულების ხელმოწერასთან დაკავშირებით დაგეგმილ კონცერტზე მოსახლეობას სიტყვით საქართველოს პრეზიდენტი გიორგი მარგველაშვილი და პრემიერ-მინისტრი ირაკლი ღარიბაშვილი მიმართავენ, – ამის შესახებ ჟურნალისტებს მთავრობის ადმინისტრაციის უფროსის მოადგილემ ნინო კობახიძემ გუშინ განუცხადა.
“27 ივნისს, საქართველოს სამთავრობო დელეგაცია ბრიუსელში ჩაიტანს ქართველი ხალხის მთავარ გზავნილს, რომლითაც კიდევ ერთხელ დადასტურდება, რომ საქართველოს ევროპული გზა ჩვენი ურყევი ნებაა. სწორედ ამ დღესთან დაკავშირებით 20.30 საათზე ჩვენ გავმართავთ კონცერტს თბილისში, ევროპის მოედანზე. მასში მონაწილეობას მიიღებენ ჩვენი ცნობილი მომღერლები, რომლებიც ევროპაში მოღვაწეობენ, ასევე, ქართველი ვარსკვლავები. დიდი სურვილი გვაქვს, რომ სრულიად საქართველოსთან ერთად გავიზიაროთ ეს დიდი სიხარული, რაც ხელშეკრულების დღეს თან სდევს”, – აღნიშნა ნინო კობახიძემ.
მისივე ინფორმაციით, 28 ივნისს, საქართველოს პრემიერ-მინისტრი ამ დღესთან დაკავშირებით, ბათუმში გამართავს მიღებას დიპლომატიური კორპუსის წარმომადგენლებისთვის.
“28 ივნისს, პრემიერი დახურავს უსაფრთხოების კონფერენციას, რომელიც ბათუმში გაიმართება და სწორედ ამიტომ, მიღება დიპლომატიური კორპუსისთვის ამ ქალაქში არის დაგეგმილი. ხოლო დელეგაცია, რომელიც ბრიუსელიდან დაბრუნდება, შეუერთდება ევროპის მოედანზე მიმდინარე კონცერტს. კონცერტზე მოსახლეობას სიტყვით მიმართავს საქართველოს პრეზიდენტი და პრემიერ-მინისტრი”, – განაცხადა ნინო კობახიძემ.
25.06.14
