რუსეთს ყველაზე ნაკლები რესურსი საქართველოს წინააღმდეგ აქვს, ვინაიდან საქართველოს გონივრული და სწორი პოლიტიკის შედეგად, პრაქტიკულად, დისტანცირებული ვართ რუსეთისგან. ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა, პაატა ზაქარეიშვილმა ჟურნალისტებს რუსეთის საგარეო საქმეთა მინისტრის, სერგეი ლავროვის განცხადების კომენტირებისას განუცხადა.
“რუსეთის საგარეო საქმეთა მინისტრის განცხადება ეხება არა მარტო საქართველოს, არამედ იმ სახელმწიფოებს, ვინც ხელს აწერს ასოცირების ხელშეკრულებას. ეს არის უკრაინა, მოლდოვა და საქართველო. ასე რომ, ამ კონტექსტიდან გამომდინარე, რუსეთს ყველაზე ნაკლები რესურსები საქართველოს წინააღმდეგ აქვს, რადგან საქართველოს გონივრული და სწორი პოლიტიკის შედეგად ჩვენ, პრაქტიკულად, დისტანცირებული ვართ რუსეთიდან, როგორც ეკონომიკურად, ისე პოლიტიკურად. ჩვენ დიპლომატიური ურთიერთობებიც კი არ გვაქვს. აქედან გამომდინარე, არ ველოდები, რომ რუსეთს შეუძლია საქართველო სერიოზულად დააზარალოს. თუმცა, ბუნებრივია, დღევანდელი განცხადებით ჩანს, რომ რუსეთს წარმოდგენილი აქვს, თუ რა მოხდება ეკონომიკური მიმართულებით”, – განაცხადა პაატა ზაქარეიშვილმა.
რაც შეეხება ოკუპირებული ტერიტორიების მიმართ არსებულ პოლიტიკას, ზაქარეიშვილის თქმით, ეს ოკუპაცია უკვე განხორციელებულია 2008 წელს და ამ მიმართულებით განსაკუთრებით არსებით ცვლილებებს არ უნდა ველოდოთ.
ზაქარეიშვილის თქმით, პირიქით, ჩვენ ნელ-ნელა ვმუშაობთ, რათა ურთიერთობები გავაუმჯობესოთ.
რუსეთის საგარეო უწყების ხელმძღვანელმა, სერგეი ლავროვმა განაცხადა, რომ რუსეთი მსოფლიო სავაჭრო ორგანიზაციის კანონებით განსაზღვრულ თავდაცვით ზომებს მიიღებს, თუ ევროკავშირთან შეთანხმებას ნეგატიური შედეგები ექნება დსთ-ს თავისუფალი სავაჭრო ზონისთვის.
“როგორც კი ძალაში შევა ასოცირების შეთანხმება და ჩვენ გავაანალიზებთ, რომ ეს ნეგატიურად აისახება დსთ-ს თავისუფალ სავაჭრო ზონაზე, იმ პირობებზე, რა პირობებითაც ჩვენ მსოფლიო სავაჭრო ორგანიზაციაში გავწევრიანდით, რუსეთი თავდაცვით ზომებს მიიღებს”, – განაცხადა სერგეი ლავროვმა.
26.06.14
