პრემიებთან დაკავშირებით მიღებული დადგენილებით თითქოს დაარეგულირეს პრემიების საკითხი, მაგრამ ამ დადგენილებაში არაფერი არ არის ნათქვამი დანამატებზე , – ამის შესახებ “ნაციონალური მოძრაობის” ერთ-ერთმა ლიდერმა ირმა ნადირაშვილმა დღეს ჟურნალისტებთან განაცხადა.
მისი თქმით, აღნიშნული დადგენილების მიღება გამოსავალი არ არის.
“გავრცელდა ინფორმაცია, რომ შეიმუშავეს დადგენილება პრემიებთან დაკავშირებით. მე დარწმუნებული ვარ, რომ ეს არის ჩვენი მატყუარა ხელისუფლების მორიგი ტყუილი, თითქოს დაარეგულირეს პრემიების საკითხი, მაგრამ ამ დადგენილებაში არაფერი არ არის ნათქვამი დანამატებზე. საქმე გვაქვს ისევ ჰაკიმ-ფაშას არითმეტიკასთან, სულ ერთია რას დაარქმევენ, დანამტს თუ პრემიას. ის, რომ არ უნდა აიღო 40 000 ლარი თვეში, ამას არ სჭირდება გერმანელი კონსულტანტის ჩამოყვანა, მისთვის დამატებით ფულის გადახდა, ამას არ სჭირდება ორწლიანი ლოდინი, ამას სჭირდება კეთილსინდისიერება, რაც მთავრობას ნანმდვილად არ გააჩნია. ვთვლი, რომ ეს საკითხები ვერ მოგვარდება, ისე როგორც ვერ მოგვარდა ნათესავების პრობლემა, ძვირადღირებული მანქანების პრობლემა, ასე, რომ გამოსავალს ამაში ვერ ვხედვა”, – განაცხადა ირმა ნადირაშვილმა.
დღეს მთავრობის სხდომაზე გავიდა საკითხი მთავრობის დადგენილების შესახებ, რომელიც დაარეგულირებს პრემიების გაცემის ზედა ზღვარს და იმ პირთა ვინაობას, რომლებსაც ექნებათ საშუალება პრემიები გასცენ.
26.06.14
