საქართველოს მთავრობა ე.წ. მაჰმადიანი მესხების რეპატრიაციის სახელმწიფო სტარტეგიაზე მუშაობს. “ყოფილი სსრკ-ის მიერ XX საუკუნის 40-იან წლებში საქართველოდან იძულებით გადასახლებულ პირთა რეპატრიაციის შესახებ სახელმწიფო სტატეგიას” დევნილთა და განსახლების სამინისტრო ამზადებს.
მთავრობის დღევანდელი სხდომის დღის წესრიგის გათვალისწინებით, საკითხი მინისტრთა კაბინეტის სხდომაზე განსახილველად უნდა გასულიყო.
აღნიშნულ თემაზე განმარტება სხდომის დაწყების წინ მინისტრმა დავით დარახველიძემაც გააკეთა, თუმცა როგორც მოგვიანებით გაირკვა, მთავრობამ სტრატეგიის მიღება რამდენიმე თვით გადადო.
“პროგრამების ნაწილში გამოითქვა მოსაზრება, რომ სასურველი იქნებოდა დოკუმენტის უფრო სრულყოფა. ჩვენ დროში შეზღუდული არ ვართ და რაიმე პრობლემა არ გვაქვს, ამიტომ დოკუმენტზე მუშაობა კიდევ რამდენიმე თვით გაგრძელდება. სტრატეგია ითვალისწინებს დამატებით რეგულაციას, რათა ამ ადამიანების ინტეგრაცია საზოგადოებაში უფრო სრულყოფილად განხორციელდეს”, – განმარტა მინისტრმა მთავრობის სხდომის შემდეგ.
ცნობისთვის, ე.წ. მაჰმადიანი მესხებისთვის რეპატრიანტის სტატუსის მინიჭების თაობაზე განაცხადებების მიღების ვადა 2010 წლის 1 იანვარს ამოიწურა. სულ ქართულ მხარეს 5 841-მა სრულწლოვანმა აპლიკანტმა მიმართა. აქედან რეპატრიანტის სტატუსი 1 349-ს მიენიჭა, 7-მა უკვე მიიღო პირობადებული (საქართველოს მოქალაქეობას მიიღებენ მას შემდეგ, რაც უარს იტყვიან მოქმედ მოქალაქეობაზე) მოქალაქეობა, ხოლო 54 საქმე პირობადებული მოქალაქეობის შესახებ, უახლოეს მომავალში გადაწყდება.
26.06.14