საგამოძიებო სამსახურს ჰქონდა ოპერატიული ინფორმაცია, რომ გიგი უგულავა მიმალვას აპირებდა, – ამის შესახებ ჟურნალისტებს ფინანსთა სამინისტროს საგამოძიებო სამსახურის საზოგადოებასთან ურთიერთობის ხელმძღვანელმა, გიორგი გრძელიშვილმა დღეს გამართულ ბრიფინგზე განუცხადა.
მისი თქმით, წინასაარჩევნო მორატიუმის მიუხედავად უგულავას დაკავება აუცილებლობით იყო გამოწვეული. “მორატორიუმს რაც შეეხება, მინდა განვმარტო, რომ ოპერატიული ინფორმაციის საფუძველზე გიგი უგულავა აპირებდა მიმალვას, აპირებდა თავი აერიდებინა საგამოძიებო მოქმედებებისთვის, შესაბამისად, აქედან გამომდინარე, გამოწვეული გადაუდებელი აუცილებლობით იქნა აყვანილი. გუშინდელი დღის განმავლობაში გიგი უგულავამ ორჯერ შეცვალა გამგზავრების მიმართულება, ჯერ ჰქონდა ერთი ბილეთი, შემდეგ აიღო მეორე. არსებობდა ოპერატიული ინფორმაცია, რომ ის აღარ დაბრუნდებოდა საქართველოში”, – განაცხადა გიორგი გრძელიშვილმა.
რაც შეეხება იმას, თუ რატომ არ დააკავეს გიგი უგულავა, მაშინ როდესაც დააკავეს მისი ქვისლი გიორგი ღონიაშვილი, გრძელიშვილი განმარტავს, რომ “როდესაც დააკავეს ღონიაშვილი, მაშინ იყო შეკრებული საკმარისი მტკიცებულებები. გამოძიების ამ ეტაპზე შეიკრიბა უგულავას წინააღმდეგ საკმარისი მტკიცებულები, შესაბამისად, მოხდა მისი დაკავება”.
გუშინ გიგი უგულავა აცხადებდა, რომ კიშინოვში მიფრინავდა, დაკავების წინ კი აღნიშნა, რომ კიევში მიემგზავრებოდა. გიგი უგულავა დღეს გამთენიისას დააკავეს. გიორგი უგულავა ფინანსთა სამინისტროს საგამოძიებო სამსახურმა, განსაკუთრებით დიდი ოდენობის უკანონო შემოსავლის ლეგალიზაციის ფაქტზე დააკავა. გიგი უგულავას 9-დან 12 წლამდე პატიმრობა ემუქრება.
03.07.14
