საქართველოს პრეზიდენტმა გიორგი მარგველაშვილმა ედუარდ შევარდნაძის ოჯახს მიუსამძიმრა. როგორც გიორგი მარგველაშვილმა ჟურნალიტებს განუცხადა , ედუარდ შევარდნაძე მე-20 საუკუნის ერთ-ერთი გამორჩეული პოლიტიკოსი იყო.
“ჩვენ გამოვუცხადეთ სამძიმარი ედუარდ შევარდნაძის ოჯახს. ბატონი ედუარდი მე-20 საუკუნის ერთ-ერთი გამორჩეული პოლიტიკოსი იყო, რომელმაც მონაწილეობა მიიღო საბჭოთა სისტემის დემონტაჟში. ის იყო პოლიტიკოსი, რომლის სახელთანაც დაკავშირებულია ევროპაში კედლების ნგრევა, ახალი ევროპის წარმოქმნა”, – აღნიშნა საქართველოს პრეზიდენტმა.
მისივე თქმით, ედუარდ შევარდნაძე სერიოზულ როლს თამაშობდა ახალი საქართველოს შექმნაში და დასავლური კურსით განვითარების საქმეში.
პრეზიდენტის ინფორმაციით, ედუარდ შევარდნაძე დაიკრძალება სახელმწიფო ხარჯებით.
“სხვა საკითხებთან დაკავშირებით ოჯახი ჩამოყალიბდება”, – აღნიშნა პრეზიდენტმა.
07.07.14
