თუ თქვენ გსურთ, რომ კვლავ საბოტაჟის მსხვერპლი გახდეთ, მაშინ ხმა მიეცით ნიკა მელიას. თუ გსურთ, რომ უნდა მისცეთ ხმა განვითარებას, უნდა მისცეთ ხმა დავით ნარმანიას , – ამის შესახებ ჟურნალისტებთან საუბარში საქართველოს პრემიერ-მინისტრმა ირაკლი ღარიბაშვილმა განაცხადა.
მისი თქმით, მეორე ტური მნიშვნელოვანია ქვეყნისათვის, ასევე მნიშვნელოვანია ქართული დემოკრატიის განვითარებისათვის.
პრემიერის განცხადებით, სახელმწიფომ და ხელისუფლებამ დაადასტურა, რომ მოწოდებულია იმისათვის, რათა ქვეყანაში რეალურად განვითარდეს დემოკრატია.
ირაკლი ღარიბაშვილი დარწმუნებულია, რომ მეორე ტურში ყველგან კოალიცია “ქართული ოცნების” კანდიდატები გაიმარჯვებენ.
“მათ უბრალოდ ვერ გადალახეს პირველ ტურში 50%-იანი ბარიერები, რომლებიც პირადად ჩემი ინიციატივით დაწესდა”, – განაცხადა ირაკლი ღარიბაშვილმა.
პრემიერი ასევე გამოეხმაურა გუშინ კოალიცია “ქართული ოცნების” თბილისის მერობის კანდიდატის დავით ნარმანიას და “ნაციონალური მოძრაობის” მერობის კანდიდატის ნიკა მელიას დებატებს.
“მიმაჩნია, რომ ნარმანიამ ღირსეულად დაამარცხა თავისი კონკურენტი, ამ შემთხვევაში, სამწუხაროდ, ისევ მელია. თუმცა მიმაჩნია, რომ არავითარი პრობლემა არ იქნება. ჩვენ, გასულ წელს ძალიან რთული კოჰაბიტაციის პერიოდი გავიარეთ, ძალიან კარგად გვახსოვს, მითუმეტეს, თბილისის მცხოვრებლებს, თუ როგორ მიზანმიმართულ საბოტაჟურ პოლიტიკას ახორციელებდა ყოფილი მერი გიგი უგულავა და მის დაქვემდებარებაში არსებული სამსახურები”, – განაცხადა ირაკლი ღარიბაშვილმა.
მისივე თქმით, ანალოგიური საბოტაჟის ნიშნები შეინიშნებოდა დედაქალაქის გარდა სხვა რეგიონებში.
“ჩვენ მეორე ტურით დავასრულებთ საბოტაჟს”, – დასძინა ირაკლი ღარიბაშვილმა.
10.07.14
