კომფორტული, ლამაზი და მყუდრო სახლი ყველა ადმიანის ოცნებაა, “თბილისი თაიმსი” დაინტერესდა თუ რამდენად მოთხოვნადია საქართველოში არქიტექტურული კომპანიების მომსახურეობა და რა თანხაა საჭირო სასურველი ინტერიერის შესაქმნელად. გამოკითხული კომპანიები არქიტექტურული მომსახურების პოპულარობასა და კონკურენციის დონეზე საუბრობენ.
არტ -ჰაუსი: ”ჩვენ მომხმარებელს ვთავაზობთ წინასწარ კონსულტაციებს საპროექტო ობიექტის შესახებ, ინტერიერისა და ექსტერიერის დიზაინს, ესკიზურ პროექტებს, ობიექტის 3 D მოდელირებასა და საინჟინრო ექსპერტიზას. ჩვენი მომსახურეობა ძალიან მოთხოვნადი და პოპულარულია, მომხმარებელთა სიმცირეს არ ვუჩივით. ქართველი მომხმარებელი ინტერიერის მინიმალისტურ სტილს ანიჭებს უპირატესობას, დიზაინში კი იგძნობა ევროპული კულტურის გავლენა. ინტერიერის დიზაინის გაკეთების მინიმალური საფასური არის 25 $ მაქსიმალური კი 90 $ კვადრატულ მეტრზე. კონკურენცია საკმაოდ მაღალია. ”
არქთრეიდი: ”ჩვენი კომპანია მომხმარებელს ინტერიერისა დიზაინს სთავაზობს, ოფისებისა თუ სახლების ავეჯსა და აქსესუარებს. მოთხოვნა საკმაოდ მაღალია, ჩვენი მომსახურება დიდი პოპულარობით სარგებლობს. ახლა ტენდენციურია ინტერიერის ევროპული, თანამედრვე სტილი, მაქსიმალურად მყუდრო. მომსახურეობის საფასური ყოველჯერზე განსხვავებულია და დამოკიდებულია ფართსა და იმაზე, თუ რა მომსახურება სურს კლიენტს. კონკურენტები არიან ბაზარზე, თუმცა ვერ ვიტყვი რომ კონკურენცია მაღალია. ”
მაგისტილი: ”ჩვენ ვართ წამყვანი დეველოპერული კომპანია ბაზარზე, მომხამრებელს კი ვთავაზობთ არქიტექტურულ მომსახურებას, ინტერიერისა და ექსტერიერის დიზაინს. მოთხოვნა არც ისე მაღალია, თუმცა არც მომხმარებელთა სიმცირეს ვუჩივით. ქართველი მომხმარებელი ინტერიერის მონიმალურ და ევროპულ სტილს ირჩევს, ჭარბობს ღია და ნათელი ფერები. ინტერიერის დიზაინის შექმნას ჩვენი კომპანია 25$-დან 40$-მდე სთავაზობს კვადრატულ მეტრზე. კონკურენცია ნორმალურია, არც ისე მაღალი.”
არტ ლაინსი: ”ჩვენ მომხარებელს სრულ არქიტექტურულ მომსახურებას ვთავაზობთ, ინტერიერისა და ექსტერიერის დიზაინს. მოთხოვნა არც ისე დიდია, ვფიქრობ ეს ყველაფერი ჩვენი კულტურიდან გამომდინარეობს, ხალხი არქიტექტურულ მომსახურებას ნაკლებად ითხოვს. დღესდღეობით საქართველოში პოპულარულია მინიმალისტური სტილი, ინტერიერში ჭარბობს ღია ფერები. არტ ლაინში ინტერიერის დიზაინის შექმნის ფასები იწყება 15$-დან (კვადრატული მეტრი), ფასი დამოკიდებულია შესასრულებელი სამუშაოს სირთულეზე. კონკურენცია არ არის მაღალი, რადგანაც ამ სფეროში არაპროფესიონალები ჭარბობენ.”
11.07.14
ნინა პირტახია