სასჯელაღსრულებისა და პრობაციის მინისტრის სოზარ სუბარის განცხადებით, არანაირი ვერსია გამოძიებას არ დაუსახელებია, უბრალოდ გამოძიება უნდა დაწყებულიყო კონკრეტული მუხლით და ამ შემთხვევაში ეს იყო თვითმკვლელობამდე მიყვანა. ამის შესახებ სოზარ სუბარმა ჟურნალისტებს კიწმარიშვილის გარდაცვალებასთან დაკავშირებით, მთავრობის სხდომის დაწყებამდე განუცხადა.
“პირველ რიგში სამძიმარი მინდა ვუთხრა ეროსი კიწმარიშვილის ოჯახს, ახლობლებს, გუშინ მთელი დღე სპეკულაციები მიდიოდა, თითქოს ნაადრევად იქნა რაღაც ვერსიები გამოძიების მხრიდან ნათქვამი, არანაირი ვერსია გამოძიებას არ დაუსახელებია, უბრალოდ გამოძიება უნდა დაწყებულიყო კონკრეტული მუხლით და არა ზოგადად სისხლის სამართლის კოდექსით და ამ შემთხვევაში ეს მუხლი იყო თვითმკვლელობამდე მიყვანა. ხვალ, ზეგ და შეიძლება დღესვე გადაკვალიფიცირდეს მუხლი თუ კი შესაბამისი მტკიცებულებები იქნება, სხვა ამ ეტაპზე ვერაფერს ვიტყვი”, – განაცხადა სასჯელაღსრულების მინისტრმა.
ეროსი კიწმარიშვილი 15 ივლისს გარდაიცვალა. მთავარი პროკურატურის ინფორმაციით, უწყებაში შევიდა შეტყობინება, რომ ქალაქ თბილისში, ილია ჭავჭავაძის გამზირზე, #37-ე “დ” კორპუსის მიწისქვეშა ავტოფარეხში გაჩერებულ ავტომანქანაში აღმოჩენილი იყო მამაკაცის გვამი. მათივე ცნობით, მითითებული შეტყობინების საფუძველზე, დაიწყო გამოძიება საქართველოს სისხლის სამართლის კოდექსის 115-ე მუხლით (პიროვნების თვითმკვლელობამდე მიყვანა). შემთხვევის ადგილზე მისვლისას საკუთარ ავტომანქანაში აღმოჩნდა ეროსი კიწმარიშვილის გვამი, რომელსაც თავის არეში აღენიშნებოდა სავარაუდოდ, ცეცხლსასროლი იარაღით მიყენებული ჭრილობა. ასევე აღმოჩენილია მისივე სახელზე 15 ივლისს რეგისტრირებული ცეცხლსასროლი იარაღი, რომლიდანაც სავარაუდოდ მომხდარია გასროლა.
პროკურატურის განცხადებით, მომხდარი ფაქტის მნიშვნელობიდან გამომდინარე, ასევე სრულყოფილი, სწრაფი და ეფექტური გამოძიების მიზნით შსს-სა და პროკურატურის თანამშრომლების შემადგენლობით შეიქმნა საგამოძიებო ჯგუფი. მიმდინარეობს ინტენსიური გამოძიება. კერძოდ, მოხდა შემთხვევის ადგილის დათვალიერება, პარალელურ რეჟიმში დაინიშნა ექსპერტიზები, იკითხებიან მოწმეები და სხვ. უწყების ცნობით, მოწმდება და განიხილება მომხდარის სხვადასხვა ვერსია. “გამოძიების შედეგებს საზოგადოებას ვაცნობებთ მოგვიანებით”, – ნათქვამია პროკურატურის განცხადებაში.
16.07.14
