ასოცირების ხელშეკრულების რატიფიცირებასთან დაკავშირებით დღეს პარლამენტში საკომიტეტო მოსმენები გაიმართება, – ამის შესახებ ჟურნალისტებს საგარეო საქმეთა მინისტრმა მაია ფანჯიკიძემ გუშინ განუცხადა.
მისი თქმით, 18 ივლისს, საქართველოს პარლამენტში ასოცირების ხელშეკრულების რატიფიცირების დღეს, ის იქნება მთავარი მომხსენებელი და აქედან გამომდინარე, ფანჯიკიძის განცხადებით, დღევანდელ მოსმენებს დიდი მნიშვნელობა ენიჭება.
“ყველა ის საკითხი, რომელიც დეპუტატებს აინტერსებთ, იქნება დასმული. ჩემთან ერთად იქნებიან იმ უწყებების მინისტრების მოადგილეები, რომელბიც მონაწილეობდნენ ამ პროცესში. ისინი გასცემენ დეტალურად პასუხებს დეპუტატების კითხვებს. ხოლო ჩემი მოხსენება იქნება პოლიტიკური ხასიათის”, – განაცხადა მაია ფანჯიკიძემ.
მისივე თქმით, სწორედ იმიტომ, რომ ევროკავშირი ძალიან დიდ მნიშვნელობას ანიჭებს ასოცირების ხელშეკრულებას და მის რატიფიკაციას, სპეციალურად ამ დღისთვის საქართველოში ჩამოდის ევროკომისარი გაფართოებისა და სამეზობლო პოლიტიკის საკითხებში შტეფან ფულე. ფულე დაესწრება რატიფიცირების საზეიმო ნაწილს და შემდეგ პლენარულ სხდომაზე სიტყვით გამოვა.
როგორც ფანჯიკიძემ აღნიშნა, ფულეს გარდა საქართველოში ჩამოვლენ და ამ ღონისძიებას დაესწრებიან ბულგრეთისა და ლატვიის საგარეო საქმეთა მინისტრები.
17.07.14
Discussion about this post