ფინანსთა მინისტრი, ნოდარ ხადური მრჩეველთა საბჭოს წევრებს შეხვდა. მინისტრი მათ იანვარ-მაისში ეკონომიკური ზრდის დადებით ტენდენციებს , მაკროეკონომიკურ მაჩვენებლებს და საგადასახადო შემოსავლების კუთხით ექვსი თვეში არსებულ დინამიკა გააცნო.
ნოდარ ხადურის განცხადებით, ექსერტებს ექვსი თვის მაჩვენებლებს აცნობს, მათ შორის ივნისის მაჩვენებლებსაც.
“მინდა გითხრათ, რომ ივნისში ეკონომიკური ზრდა გაგრძელდა დღგ-ის გადამხდელთა საწარმოების ბრუნვა იყო 11%-ზე მეტი, რაც ნიშნავს, რომ დაახლოებით 5.5% ივნისში იყო ეკონომიკურ ზრდა, ანუ 6 თვის განმავლობაში ისევ 6%-ზეა საუბარი. ჩვენ ბიჯეტი დავგეგმეთ 5%-იან მაჩვენებელზე, ანუ ზედმეტად ოპტიმისტები არ ვყოფილვართ, მით უმეტეს, რომ საერთაშორისო ორგანიზაციები, მათ შორის მსოფლიო ბანკი გვირჩევდა უფრო ოპტიმისტები ვყოფილიყავით, მაგრამ ჩვენ კონსერვატიული ბიუჯეტი შევარჩიეთ, რაც ვფიქრობ, რომ ამ ეტაპზე იყო აბსოლუტურად სწორი”, – განაცხადა მინისტრმა.
კითხვაზე, რით ახსნის აპრილში ეკონომიკურ ვარდნას, მინისტრმა განმარტა, რომ ვარდნა არ ყოფილა, არამედ იყო შეფერხება. ხადურმა აღნიშნა, რომ ამ საკითხით ექსპერტები დაინტერედნენ და მათ ზუსტი ინფორმაცია მიეწოდათ.
ამასთან, ხადურმა აღნიშნა, რომ აპრილში, სოფლის მეურნეობის სექტორში იყო სერიოზული ზრდა, ასევე მშენებლობაში და პრაქტიკულად 2-3 სფეროს გარდა ამ თვეში ეკონომიკაში გრძელდებოდა ზრდის პროცესი.
როგორც ხადურმა აღნიშნა, დარიალში მომხდარი სტიქიის გამო იმ პერიოდის განმავლობაში ექსპორტი გაძვირდა და ამის მიზეზი კი იყო ის, რომ გზა იყო ჩაკეტილი, ან ტვირთი იყო გაჩერებული, ან ალტერნატიული უფრო შორი გზით უწევდათ მოძრაობა გადამზიდავებს.
“ცხადია, ამან გააძვირა ექსპორტი, თუმცა დაახლოებით 17%-იანი ზრდა არის ექსპორტში მიმდინარე 6 თვეში”, – განაცხადა ნოდარ ხადურმა.
17.07.14
