ბრიუსელში “აღმოსავლეთ პარტნიორობის” მინისტერიალის ფარგლებში საგარეო საქმეთა მინისტრის მოადგილე თამარ ბერუჩაშვილი ფინეთის საგარეო საქმეთა სამინისტროს რუსეთის, აღმოსავლეთ ევროპისა და ცენტრალური აზიის დეპარტამენტის გენერალურ დირექტორს ტერი ჰაკალას შეხვდა.
საგარეო საქმეთა სამინისტროს ინფორმაციით, შეხვედრაზე მხარეებმა ორ ქვეყანას შორის არსებული ორმხრივი და მრავალმხრივი ურთიერთობების ფართო სპექტრი და სამომავლო თანამშრომლობის პერსპექტივები განიხილეს.
განსაკუთრებული ყურადღება დაეთმო ევროპული და ევრო-ატლანტიკური ინტეგრაციის გზაზე საქართველოს მიერ მიღწეულ პროგრესს. კერძოდ, ევროკავშირი-საქართველოს ასოცირების შესახებ შეთანხმების ხელმოწერასა და შეთანხების განხორციელების თვალსაზრისით საქართველოს მთავრობის გეგმებს.
მხარეებმა 2015 წელს რიგაში დაგეგმილ “აღმოსავლეთ პარტნიორობის” სამიტამდე საქართველო-ევროკავშირის თანამშრომლობის შემდგომი გაღრმავების გზებზეც იმსჯელეს.
შეხვედრისას ფინურმა მხარემ კიდევ ერთხელ გამოხატა ურყევი მხარდაჭერა ევროკავშირში საქართველოს ინტეგრაციის პროცესის ხელშეწყობასთან დაკავშირებით და ასოცირების შეთანხმების განხორციელების პროცესში დახმარება აღუთქვა.
23.07.14
