ამერიკის შეერთებულმა შტატებმა, ევროკავშირის კვალდაკვალ, რუსეთის წინააღმდეგ ახალი სანქციები შემოიღო. როგორც “ბიბისი” წერს, ამერიკის შეერთებული შტატების პრეზიდენტმა , ბარაქ ობამამ განაცხადა, რომ აშშ შეუერთდა ევროკავშირის მიერ მოსკოვისთვის დაწესებულ სანქციებს, რომელიც ენერგეტიკის, თავდაცვის და ფინანსების სფეროებს ეხება.
ობამას განცხადებით, ახალი ეკონომიკური ზომების მიზანია, რუსეთის ეკონომიკას მიაყენონ დარტყმა და ეს იქნება სასჯელი იმისათვის, რომ მოსკოვი აგრძელებს უკრაინის აღმოსავლეთში სეპარატისტების მხარდაჭერას.
“სერიოზული სანქციები, რომელიც დღეიდან შემოდის, მოწოდებულია იმისკენ, რომ რუსეთზე დამატებითი ზემოქმედება მოხდეს, მათ შორის ვლადიმერ პუტინის გარემოცვაზე და იმ კომპანიებზე, რომლებიც ხელს უწყობენ რუსეთის უკანონო ქმედებებს უკრაინის ტერიტორიაზე”, – განაცხადა ობამამ.
ჟურნალისტის კითხვაზე, ხომ არ ნიშნავს ახალი სანქციები ახალი “ცივი ომის” დაწყებას, ობამამ განაცხადა, რომ ეს არ არის “ცივი ომი”, ეს არის კონკრეტული ზომა იმის გამო, რომ რუსეთს არ სურს აღიაროს უკრაინის უფლება თვითონ აირჩიოს საკუთარი მომავალი.
“თუ თქვენ მოუსმენთ უკრაინის პრეზიდენტ პეტრო პოროშენკოს, თუ თქვენ მოუსმენთ უკარინელ ხალხს, დაინახავთ, რომ ყველანი ისინი გამოხატავენ სურვილს რუსეთთან კეთილმეზობლური ურთიერთობები დაამყარონ. თუმცა, მათ არ შეუძლიათ დაუშვან ის, რომ რუსეთი აიარაღებს სეპარატისტებს, რომლებიც აღმოსავლეთ უკრაინაში დამანგრეველ ქმედებებს ახორციელებენ”, -განაცხადა ობამამ.
30.07.14
