ზუგდიდის მუნიციპალიტეტის სოფელ რუხში დღეს მაღალტექნოლოგიური კლინიკის მშენებლობა იწყება. პრემიერის პრესსამსახურის ინფორმაციით, მშენებლობის გახსნას საქართველოს პრემიერ-მინისტრი ჯანდაცვისა და ინფრასტრუქტურის მინისტრებთან ერთად დაესწრება. ირაკლი ღარიბაშვილი, დავით სერგეენკო, დავით შავლიაშვილი და სამეგრელო-ზემო სვანეთის გუბერნატორი ლევან შონია კლინიკის საძირკველში სიმბოლური კაფსულის ჩადგმაში მიიღებენ მონაწილეობას. სოფელ რუხის ტერიტორიაზე 220 საწოლზე გათვლილი მრავალპროფილური კლინიკა ორ წელიწადში აშენდება. კომპლექსის ტერიტორიაზე მოეწყობა სპორტული მოედნები, ავტოსადგომები, შიდა სავალი გზები, წყლის აუზები და სკვერები. ასევე, საავადმყოფოს ტერიტორიაზე აშენდება სასტუმროს ტიპის საერთო საცხოვრებელი, რომელიც რეზიდენტებისა და პაციენტთა ნათესავებისთვის იქნება განკუთვნილი. მაღალი სიმძლავრის საუნივერსიტეტო კლინიკის მშენებლობა სამეგრელოსა და მიმდებარე რეგიონებში სამედიცინო მომსახურების გაუმჯობესებას შეუწყობს ხელს, ასევე, ერთმანეთთან დააკავშირებს ენგურის ორივე მხარეს. პროექტის ღირებულება 40 მილიონ ლარს აჭარბებს. მშენებლობაზე ძირითადად ადგილობრივი მოსახლეობა, ჯამში რამდენიმე ასეული ადამიანი დასაქმდება, ხოლო კლინიკის ფუნქციონირების დაწყების შემდეგ ადგილობრივები საავადმყოფოს სხვადასხვა პერსონალის პოზიციაზე იმუშავებენ. 25.08.14
