საქართველოს ამერიკის შეერთებული შტატების თავდაცვის მდივანი ჩაკ ჰეიგელი ესტუმრა. ამერიკელ მაღალჩინოსანს თბილისის საერთაშორისო აეროპორტში აშშ-ის ელჩი საქართველოში რიჩარდ ნორლანდი, საქართველოს ელჩი აშშ-ში არჩილ გეგეშიძე და საქართველოს თავდაცვის მინისტრის მოადგილე მიხეილ დარჩიაშვილი დახვდნენ.
როგორც ამერიკის საელჩოს ფეისბუქის ოფიციალურ გვერდზე გამოქვეყნებულ ინფორმაციაშია აღნიშნული, ჰეიგელს სურს მადლობა გადაუხადოს ქართველ ხალხს გასული ათწლეულის განმავლობაში ერაყისა და ავღანეთის მისიებში შეტანილი წვლილისა და გაღებული მსხვერპლისათვის.
ვიზიტის ფარგლებში ჰეიგელი საქართველოს თავდაცვის უწყებაში 7 სექტემბერს მივა, სადაც დახვედრის ოფიციალური ცერემონია გაიმართება. დაგეგმილია ასევე, საქართველოს თავდაცვის მინისტრისა და აშშ-ის თავდაცვის მდივნის ერთობლივი პრესკონფერენცია. იმავე დღეს აშშ-ის თავდაცვის მდივანი, ქართველ კოლეგასთან ერთად, ეროვნულ სასწავლო ცენტრ “კრწანისში” ქართველ სამხედროებსა და ამერიკელ საზღვაო ქვეითებს შეხვდება და მათ სიტყვით მიმართავს.
06.09.14
