2015 წელს მასწავლებლის სახელფასო პოლიტიკის მოწესრიგება დაიწყება. ამის შესახებ პედაგოგებთან შეხვედრაზე პრემიერ-მინისტრმა ირაკლი ღარიბაშვილმა განაცხადა.
ირაკლი ღარიბაშვილმა პედაგოგებს განათლების სისტემაში მიმდინარე სიახლეები გააცნო და აღნიშნა, რომ 21 სპეციალობაზე უმაღლესი განათლების სწავლა უფასო გახდა, რაც ძალიან მნიშვნელოვანია.
“ჩვენ განსაკუთრებით გვჭირდება კონკრეტული დარგების განვითარება, და ვამაყობ, რომ სწორედ ჩვენი მთავრობის ძალისხმევით ნიჭიერ და მონდომებულ ახალგაზრდებს ეძლევათ საუკეთესო საშუალება, უფასოდ მიიღონ განათლება ისეთ სპეციალობებში, რომლებიც მართლაც ძალიან საჭირო და პერსპექტიულია. 2013-2014 წლებში სოლიდური დაფინანსება მიიღეს დოქტორანტმა სტუდენტებმა. ჩემი ინციატივით ჩამოყალიბდა განათლების საერთაშორისო ცენტრი, სადაც მოხდა რესურსების კონსოლიდაცია, რათა რაც შეიძლება მეტ ახალგაზრდას მისცემოდა საზღვარგარეთ განათლების მიღების საშუალება”, – აღნიშნა პრემიერ მინისტრმა.
მისივე თქმით, განათლების ცენტრმა მსოფლიოს წამყვან უნივერსიტეტებში 77 სტუდენტის სწავლება უკვე დააფინანსა. მთავრობის ერთ-ერთი პრიორიტეტია ასევე პროფესიული განათლების მხარდაჭერა, რომელიც სახელმწიფომ ასევე სრულად დააფინანსა და ამ სფეროს მომავალშიც განსაკუთრებულ ყურადღება მიექცევა.
“ერთ-ერთი ძირითადი მიმართულება, რომელიც განათლებისა და მეცნიერების განვითარების მიზნით შექმნილი სტრატეგიის ფარგლებში გამოიკვეთა, გეხებათ თქვენ, პედაგოგებს, პედაგოგიურ განათლებას, პედაგოგიურ პრაქტიკას და შესაბამისად, მოსწავლეთა სწავლის შედეგების გაუმჯობესებას. ეს პრინციპულად მნიშვნელოვანი მიმართულებაა, რადგან მხოლოდ მაღალკვალიფიციურ და მოტივირებულ მასწავლებლებს შეუძლიათ მოსწავლეებისათვის საუკეთესო ცოდნის მიცემა. მხოლოდ პროფესიონალ პედაგოგებს შეუძლიათ ისეთი მომავალი თაობის აღზრდა, რომელიც იქნება მაქსიმალურად რეალიზებული და წარმატებული. ამიტომ, მივესალმები ძალიან დროულ და მნიშვნელოვან წამოწყებას, რომელიც ორიენტირებულია პედაგოგის მხარდაჭერასა და პროფესიულ განვითარებაზე. მე დიდი იმედი მაქვს, რომ მასწავლებელთა პროფესიული განვითარების ახალი სისტემა ახალ პერსპექტივას შექმნის ჩვენი ქვეყნის განათლების სფეროში”, – დასძინა ღარიბაშვილმა.
მისივე თქმით, მათი მიზანია მასწავლებლის პროფესია ერთ-ერთ ყველაზე პრესტიჟულ პროფესიად აქციონ, როგორც ეს მსოფლიოს ყველაზე წარმატებულ ქვეყნებშია.
ღარიბაშვილი მიიჩნევს, რომ ასეთი მხარდაჭერით, კომპლექსური მიდგომით, თანამიმდევრული ნაბიჯებით მასწავლებლობა ახალგაზრდებისთვის მიმზიდველი პროფესია გახდება. პრემიერმა იმედი გამოთქვა ასევე, რომ განათლების სფეროსათვის ასეთ მნიშვნელოვან პროცესებში, მასწავლებლები აქტიურად ჩაერთვებიან.
“საქართველოს მთავრობა ამ საკითხს ძალიან სერიოზულად ეკიდება და გეგმავს მხარი დაუჭიროს რეფორმას. მასწავლებლის მოტივაციის გაზრდა უაღრესად მნიშვნელოვანია. ჩვენ მზად ვართ ამ ინიციატივის ფინანსური ხელშეწყობისთვის. თქვენ იცით, რომ 2012-2013 წლებში პედაგოგებისა და სკოლის სხვა პერსონალის ხელფასი, გაუმჯობესდა პედაგოგის საშვებულებო პირობები გაიზარდა. მინდა გითხრათ, რომ 2015 წელს დამატებით გამოიყოფა ფინანსური რესურსები და მასწავლებლის სახელფასო პოლიტიკის მოწესრიგება დაიწყება. ნოემბრის თვისთვის გვეცოდინება დამატებითი ინვესტიციების ზუსტი მოცულობა. მასწავლებლის ხელფასი იქნება მზარდი 2016 და 2017 წლებშიც”, – აღნიშნა პრემიერ მინისტრმა.
მისივე თქმით, მისასალმებელია, რომ ახალი სქემის მიხედვით მასწავლებლის ანაზღაურების ზრდა, დამოკიდებული იქნება მხოლოდ და მხოლოდ მის მიღწევებზე, რაც თითოეულ მასწავლებელს გაუზრდის მოტივაციას.
“თქვენზე ძალიან ბევრია დამოკიდებული. ვიცი, რამხელა პასუხისმგებლობით ეკიდებით საკუთარ საქმეს, რისთვისაც თითოეულ თქვენგანს მინდა მადლობა გითხრათ. მინდა ყველას გისურვოთ წარმატებები თქვენს საქმიანობაში. მჯერა, რომ განათლების სისტემის განვითარების ამ მნიშვნელოვან ეტაპზე თქვენ ძალიან სერიოზულ როლს შეასრულებთ”, – განაცხადა ირაკლი ღარიბაშვილმა.
09.09.14